Úsh tuǵyrly til degen pále toqtatylsyn, ejelgi qazaq tarıhy joǵary oqýlyqtarǵa qaıtarylsyn, birinshi synypta oqıtyn balalarǵa Álippe oqytylsyn, al mınıstr Saǵadıev otstavkaǵa ketsin.
"Qurmetti Nursultan Ábishuly!
Siz Úkimetke tapsyrma júktegende únemi atqarýshy bılik jumysynyń ashyqtyǵyn talap etip kelesiz. Ashyqtyq máselesi «100 naqty qadam» Ult josparynda da basymdyqqa ıe boldy. Siz jabyqtyǵy men qolǵa alynǵan reformalardy halyqpen birge talqylaýǵa qulyqsyzdyǵy saldarynan túsindirý jumystaryn aqsatyp alǵan, sóıtip jaǵdaıdy úlken daǵdarysqa aparyp tiregen Úkimet múshelerine birneshe ret laýazymynan bosatýǵa deıingi tártiptik jazalar qoldandyńyz.
«Bolashaqqa baǵdar: rýhanı jańǵyrý» baǵdarlamalyq maqalańyzda Siz básekege qabilettilikti, bilimniń saltanat qurýyn, mádenı birtektilikti negizgi basymdyqtardyń qatarynda ataǵan bolatynsyz. Bul Sizdiń eldiń bilim júıesiniń sapasyna, azamattardyń óz tarıhyn tereń bilýine, óskeleń urpaqty bilimqumarlyqqa tárbıeleýge qanshalyqty joǵary mán beretinińizdiń aıqyn dáleli.
Bilim salasynyń el bolashaǵy aldyndaǵy jaýapkershiligin sezine otyryp, Siz birneshe ret atalǵan saladaǵy reformalardy asqan saqtyqpen, jan-jaqty oılastyryp júrgizýdi, asyǵystyq pen naýqanshyldyqqa jol bermeýdi talap ettińiz.
Alaıda, Bilim jáne ǵylym mınıstri Erlan Saǵadıevtiń orta, joǵary jáne joǵary oqý ornynan keıingi bilim júıesin reformalaý jónindegi bastamalary qoǵamda negizdi qorqynysh týǵyzyp otyr. Bilikti mamandardyń jetkiliksizdigi jaǵdaıynda jalpy bilim beretin orta mektepterge tereń oılastyrylmaǵan, iske asýy kúmándi úsh tildi oqytý baǵdarlamasyn engizý orta bilim berý sapasyn óte tómen deńgeıge quldyratyp jiberedi. Onymen qosa, eshkim atalǵan stresten bilim alýǵa degen qushtarlyǵy óshetin balalardyń moraldyq-psıhologıalyq jaǵdaıyn esepke alyp otyrǵan joq. Osylaısha Siz anyqtap bergen «Bilimniń saltanat qurýyna» qater tónýde.
Mınıstr Saǵadıev joǵary bilim berý salasynda Qazaqstan tarıhy kýrstaryn alyp tastap, atalǵan pándi ǵylym retinde joıyp, ony el tarıhynyń betin ǵana qalqyǵan, tek HH ǵasyrdan bastalatyn mektep kýrsymen shektemekshi. Bul mádenı birtektilikti saqtaý men rýhanı jańǵyrý múddesine qanshalyqty saı keletinin aıtý qıyn.
Joǵary bilimnen keıingi bilim berý salasynda da kúmándi reformalardy kórip otyrmyz. Bilim mınıstrliginiń birneshe mıllıardtyq ǵylymı jobalar men zertteýlerdi túrli enshiles qurylymdar arqyly qarjylandyrýynan týǵan kúmándi shyǵyndar týraly otandyq BAQ-ta talaı ret másele kóterildi.
Sonymen qatar, reformalardyń ashyqtyǵy men halyqqa túsindirilýi jónindegi Sizdiń tapsyrmańyzdy elemeı, mınıstr Saǵadıev túsindirý jumysynan, onyń ishinde televızıalyq pikir-saıys túrindegi túsindirý sharalarynan úzildi-kesildi bas tartýda.
Alaıda, densaýlyq saqtaý mınıstri Birtanovtiń televızıalyq pikir-saıysqa shyǵýy talqylaýdyń dál osy formasynyń qoǵamdaǵy otandyq medısına salasyndaǵy reformaǵa qatysty keri rezonansty basýda joǵary tıimdiligin kórsetti.
Osy baıandalǵandardy eskere otyryp, mınıstr Saǵadıevtiń qyzmeti qoǵamdyq turaqtylyqqa zıandy jáne qaýipti, korrýpsıalyq qateri joǵary dep sanaımyz. Osyǵan baılanysty ony qyzmetine laıyqsyzdyǵy jáne qoǵam senimin joǵaltýyna baılanysty Bilim jáne ǵylym mınıstri laýazymynan bosatýyńyzdy, sondaı-aq quqyqqorǵaý organdaryna túrli jarıalanymdarda kórsetilgen qarjy jymqyrý faktilerin tekserý jóninde tapsyrma berýińizdi suraımyz."
Qol qoıǵandar:
1. Muhtar Taıjan, Bolathan Taıjan qorynyń prezıdenti, e.ǵ.k.
Bas taqyryptaǵy sýret: esquire.kz saıtynan alyndy.
