ءۇش تۇعىرلى ءتىل دەگەن پالە توقتاتىلسىن، ەجەلگى قازاق تاريحى جوعارى وقۋلىقتارعا قايتارىلسىن، ءبىرىنشى سىنىپتا وقيتىن بالالارعا الىپپە وقىتىلسىن، ال مينيستر ساعادييەۆ وتستاۆكاعا كەتسىن.
"قۇرمەتتى نۇرسۇلتان ءابىش ۇلى!
ءسىز ۇكىمەتكە تاپسىرما جۇكتەگەندە ۇنەمى اتقارۋشى بيلىك جۇمىسىنىڭ اشىقتىعىن تالاپ ەتىپ كەلەسىز. اشىقتىق ماسەلەسى «100 ناقتى قادام» ۇلت جوسپارىندا دا باسىمدىققا يە بولدى. ءسىز جابىقتىعى مەن قولعا الىنعان رەفورمالاردى حالىقپەن بىرگە تالقىلاۋعا قۇلىقسىزدىعى سالدارىنان ءتۇسىندىرۋ جۇمىستارىن اقساتىپ العان، ءسويتىپ جاعدايدى ۇلكەن داعدارىسقا اپارىپ تىرەگەن ۇكىمەت مۇشەلەرىنە بىرنەشە رەت لاۋازىمىنان بوساتۋعا دەيىنگى تارتىپتىك جازالار قولداندىڭىز.
«بولاشاققا باعدار: رۋحاني جاڭعىرۋ» باعدارلامالىق ماقالاڭىزدا ءسىز باسەكەگە قابىلەتتىلىكتى، ءبىلىمنىڭ سالتانات قۇرۋىن، مادەني بىرتەكتىلىكتى نەگىزگى باسىمدىقتاردىڭ قاتارىندا اتاعان بولاتىنسىز. بۇل ءسىزدىڭ ەلدىڭ ءبىلىم جۇيەسىنىڭ ساپاسىنا، ازاماتتاردىڭ ءوز تاريحىن تەرەڭ بىلۋىنە، وسكەلەڭ ۇرپاقتى ءبىلىمقۇمارلىققا تاربيەلەۋگە قانشالىقتى جوعارى ءمان بەرەتىنىڭىزدىڭ ايقىن دالەلى.
ءبىلىم سالاسىنىڭ ەل بولاشاعى الدىنداعى جاۋاپكەرشىلىگىن سەزىنە وتىرىپ، ءسىز بىرنەشە رەت اتالعان سالاداعى رەفورمالاردى اسقان ساقتىقپەن، جان-جاقتى ويلاستىرىپ جۇرگىزۋدى، اسىعىستىق پەن ناۋقانشىلدىققا جول بەرمەۋدى تالاپ ەتتىڭىز.
الايدا، ءبىلىم جانە عىلىم ءمينيسترى ەرلان ساعادييەۆتىڭ ورتا، جوعارى جانە جوعارى وقۋ ورنىنان كەيىنگى ءبىلىم جۇيەسىن رەفورمالاۋ جونىندەگى باستامالارى قوعامدا نەگىزدى قورقىنىش تۋعىزىپ وتىر. بىلىكتى مامانداردىڭ جەتكىلىكسىزدىگى جاعدايىندا جالپى ءبىلىم بەرەتىن ورتا مەكتەپتەرگە تەرەڭ ويلاستىرىلماعان، ىسكە اسۋى كۇماندى ءۇش ءتىلدى وقىتۋ باعدارلاماسىن ەنگىزۋ ورتا ءبىلىم بەرۋ ساپاسىن وتە تومەن دەڭگەيگە قۇلدىراتىپ جىبەرەدى. ونىمەن قوسا، ەشكىم اتالعان سترەستەن ءبىلىم الۋعا دەگەن قۇشتارلىعى وشەتىن بالالاردىڭ مورالدىق-پسيحولوگيالىق جاعدايىن ەسەپكە الىپ وتىرعان جوق. وسىلايشا ءسىز انىقتاپ بەرگەن «ءبىلىمنىڭ سالتانات قۇرۋىنا» قاتەر تونۋدە.
مينيستر ساعادييەۆ جوعارى ءبىلىم بەرۋ سالاسىندا قازاقستان تاريحى كۋرستارىن الىپ تاستاپ، اتالعان ءپاندى عىلىم رەتىندە جويىپ، ونى ەل تاريحىنىڭ بەتىن عانا قالقىعان، تەك حح عاسىردان باستالاتىن مەكتەپ كۋرسىمەن شەكتەمەكشى. بۇل مادەني بىرتەكتىلىكتى ساقتاۋ مەن رۋحاني جاڭعىرۋ مۇددەسىنە قانشالىقتى ساي كەلەتىنىن ايتۋ قيىن.
جوعارى بىلىمنەن كەيىنگى ءبىلىم بەرۋ سالاسىندا دا كۇماندى رەفورمالاردى كورىپ وتىرمىز. ءبىلىم مينيسترلىگىنىڭ بىرنەشە ميللياردتىق عىلىمي جوبالار مەن زەرتتەۋلەردى ءتۇرلى ەنشىلەس قۇرىلىمدار ارقىلى قارجىلاندىرۋىنان تۋعان كۇماندى شىعىندار تۋرالى وتاندىق باق-تا تالاي رەت ماسەلە كوتەرىلدى.
سونىمەن قاتار، رەفورمالاردىڭ اشىقتىعى مەن حالىققا ءتۇسىندىرىلۋى جونىندەگى ءسىزدىڭ تاپسىرماڭىزدى ەلەمەي، مينيستر ساعادييەۆ ءتۇسىندىرۋ جۇمىسىنان، ونىڭ ىشىندە تەليەۆيزيالىق پىكىر-سايىس تۇرىندەگى ءتۇسىندىرۋ شارالارىنان ۇزىلدى-كەسىلدى باس تارتۋدا.
الايدا، دەنساۋلىق ساقتاۋ ءمينيسترى ءبىرتانوۆتىڭ تەليەۆيزيالىق پىكىر-سايىسقا شىعۋى تالقىلاۋدىڭ ءدال وسى فورماسىنىڭ قوعامداعى وتاندىق مەديسينا سالاسىنداعى رەفورماعا قاتىستى كەرى رەزونانستى باسۋدا جوعارى تيىمدىلىگىن كورسەتتى.
وسى باياندالعانداردى ەسكەرە وتىرىپ، مينيستر ساعادييەۆتىڭ قىزمەتى قوعامدىق تۇراقتىلىققا زياندى جانە ءقاۋىپتى، كوررۋپسيالىق قاتەرى جوعارى دەپ سانايمىز. وسىعان بايلانىستى ونى قىزمەتىنە لايىقسىزدىعى جانە قوعام سەنىمىن جوعالتۋىنا بايلانىستى ءبىلىم جانە عىلىم ءمينيسترى لاۋازىمىنان بوساتۋىڭىزدى، سونداي-اق قۇقىققورعاۋ ورگاندارىنا ءتۇرلى جاريالانىمداردا كورسەتىلگەن قارجى جىمقىرۋ فاكتىلەرىن تەكسەرۋ جونىندە تاپسىرما بەرۋىڭىزدى سۇرايمىز."
قول قويعاندار:
1. مۇحتار تايجان، بولاتحان تايجان قورىنىڭ پرەزيدەنتى، ە.ع.ك.
باس تاقىرىپتاعى سۋرەت: esquire.kz سايتىنان الىندى.
