Negizi, bul Saǵadievke ǵana tán emes. Biliktiń basy-qasynda júrgenderdiń talaiy osyndai. Oqshaý. Mylqaý. Jabyq. Jansyz. Tuiyq.
Halyqpen qatynasta osyndai saiasat ustanady olar. Tildeskisi kelmeidi. Bul deńgeige túskisi joq óitkeni. Olardyń túsiniginde bul deńgeige túsý abyroiyńdy túsirý. Sebebi, sen odan biiksiń. Halyqtan. Seniń aqylyń kóp, seniń sheshimderińe shúbá keltirýge bolmaidy. Árbirden soń óziń bilesiń. Árbirden soń saǵan bul qyzmetti el emes, Elbasy senip tapsyrdy ǵoi...
Saǵadiev te solai oilaityn shyǵar. Taijanmen talasa almasyn sezetin shyǵar ishtei, biraq, moiyndaǵysy joq. «Bul meniń qyzmetime jatpaidy. Maǵan ol qyzyq emes...» depti.
Aittyq qoi, jabyq, tuiyq dep.
Jabyqtyq. Tuiyqtyq. Qazaqstandaǵy sheneýnik ataýlynyń shyn bolmysy osyndai. Neden qorqady eken? Neden qaimyǵady? Túsinbeisiń. Halyqtyń aldynda kemshiligim kórinip qalady, qazaqsha bilmeitinim bilinip qalady dep oilaityn shyǵar. Basqa qandai sebep bar?
Saiasattanýshy Moizes Naim bir eńbeginde mikrobilik týraly aitqan. Ázirgi áleýmettik jeli jáne sonda otyrǵan ot tildi, oraq aýyzdy top osy – mikrobilik bizdińshe. Olar aýditoriiany ózine qaratyp otyr. Olardyń turaqty oqyrmany bar. Al biliktiń she? Biliktiń aýditoriiasy bar ma? Qaida? Olar kim? Álde bilik halyqpen qatynasta qamal turǵyzýdy ǵana bile me?
Sonyń dáleli – Saǵadiev siiaqty. «Mindetim emes. Kezdespeimin. Sóilespeimin. Ýaqytym joq». Anyǵy, bul sindrom jáne Saǵadievke ǵana tán emes. Biliktiń basy-qasynda júrgenderdiń talaiy osyndai.
Taijanmen pikirtalastyrý úshin Saǵadievtiń sanasy tranformatsiialanýy kerek shyǵar.
Biraq, bul da neǵaibyl. Ol endi ózgermeidi. Ol siiaqty ózgermei ótetinder óte kóp...
Taijan mikrobilik. Túptiń túbinde, onymen sanasýǵa týra keledi ministrge. Óitkeni onyń aýditoriiasy bar. Odan buryn onyń aiǵaqtary aiqyn. Al ministrdiń she?
Dýman BYQAI
