Májilis otyrysynda depýtat Rinat Zaiytov dári-dármek pen meditsinalyq buiymdardy saraptaýdan ótkizý barysynda saraptama merzimderiniń negizsiz sozylýy men tańdamaly tásilderdiń oryn alýyna qatysty birqatar ótkir saýal joldady, dep habarlaidy Dalanews.kz.
Onyń aitýynsha, Joǵarǵy aýditorlyq palatanyń esebinde farmatsevtikalyq naryqtaǵy joǵary importqa táýeldilik densaýlyq saqtaý júiesi men ulttyq qaýipsizdikke qaýip tóndiretini naqty kórsetilgen. Depýtat dál osy máselege nazar aýdara otyryp, saraptama júrgizý merzimderiniń shekten tys uzaryp ketkenine toqtaldy.
"2024 jyldyń qorytyndysy boiynsha ótinishterdiń 98 paiyzy belgilengen merzimnen asyp qaralǵan. Ortasha merzimi – 334 kún. Keibir jaǵdailarda saraptama 970 kúnge deiin sozylǵan. Bul – úsh jylǵa jýyq ýaqyt. Al bir ótinishke 1275 kún jumsalsa, endi birine nebári 25 kún ketken. Mundai aiyrmashylyq qalai oryn aldy? Bul jemqorlyq emes pe? Mundai tásilge jol bergen qyzmetkerlerge qandai shara qoldandyńyzdar? Aldaǵy ýaqytta mundaidy boldyrmaý úshin ne isteisizder?", – dep saýal qoidy Zaiytov.
Onyń suraǵyna Densaýlyq saqtaý vitse-ministri Erjan Shákiruly jaýap berdi. Ol burynǵy júiede adam faktorynyń yqpaly joǵary bolǵanyn jáne saraptama merzimderin tańdamaly túrde qysqartý múmkindigi bolǵanyn moiyndady.
"Buǵan úkimettiń arnaiy qaýlysy negizinde engizilgen "kompozittik qyzmet" sheshim bola alady. Qazir bul qyzmet pilottyq rejimde júzege asyrylyp jatyr. Júie tolyq tsifrlanyp, ótinishter "bir tereze" qaǵidaty boiynsha qabyldanady. Sarapshy men ótinish berýshi arasyndaǵy tikelei bailanys alynyp tastalady. Registratsiialyq kýálik berý merzimi 15 jumys kúnine deiin qysqarady", – dedi ol.
Alaida Rinat Zaiytov ministrlik ókiliniń jaýabyna tolyq qanaǵattanbady. Ol naqty faktiler boiynsha ne sebepti keibir ótinishterge erekshe kózqaras tanytylǵanyn, munyń jemqorlyq sipaty bar-joǵyn jáne jaýapty tulǵalarǵa qandai shara qoldanylǵanyn surap, qaita naqtylaýǵa májbúr boldy.
Óz kezeginde vitse-ministr Erjan Shákiruly:
"Saraptamany taǵaiyndaý merzimindegi ádiletsizdiktiń sebebi – protsestiń ashyq emestigi, sarapshynyń ótinish berýshimen tikelei bailanysy jáne saraptama júiesiniń tsifrlanbaǵany. Qazir bul máseleler joiylýda. Al naqty jaýapkershilikke tartylǵan tulǵalar týraly aqparatty jazbasha túrde usynýǵa ruqsat etińizder", – dep túiindedi.
Bul másele dári-dármek ainalymyndaǵy ashyqtyq pen ádildikke qatysty qoǵamnyń senimi men memlekettik baqylaýdyń mańyzyn taǵy bir ret alǵa tartty.
