ءماجىلىس وتىرىسىندا دەپۋتات رينات زايىتوۆ دارى-دارمەك پەن مەديسينالىق بۇيىمداردى ساراپتاۋدان وتكىزۋ بارىسىندا ساراپتاما مەرزىمدەرىنىڭ نەگىزسىز سوزىلۋى مەن تاڭدامالى تاسىلدەردىڭ ورىن الۋىنا قاتىستى ءبىرقاتار وتكىر ساۋال جولدادى، دەپ حابارلايدى Dalanews.kz.
ونىڭ ايتۋىنشا، جوعارعى اۋديتورلىق پالاتانىڭ ەسەبىندە فارماسيەۆتيكالىق نارىقتاعى جوعارى يمپورتقا تاۋەلدىلىك دەنساۋلىق ساقتاۋ جۇيەسى مەن ۇلتتىق قاۋىپسىزدىككە ءقاۋىپ توندىرەتىنى ناقتى كورسەتىلگەن. دەپۋتات ءدال وسى ماسەلەگە نازار اۋدارا وتىرىپ، ساراپتاما جۇرگىزۋ مەرزىمدەرىنىڭ شەكتەن تىس ۇزارىپ كەتكەنىنە توقتالدى.
"2024 جىلدىڭ قورىتىندىسى بويىنشا وتىنىشتەردىڭ 98 پايىزى بەلگىلەنگەن مەرزىمنەن اسىپ قارالعان. ورتاشا مەرزىمى – 334 كۇن. كەيبىر جاعدايلاردا ساراپتاما 970 كۇنگە دەيىن سوزىلعان. بۇل – ءۇش جىلعا جۋىق ۋاقىت. ال ءبىر وتىنىشكە 1275 كۇن جۇمسالسا، ەندى بىرىنە نەبارى 25 كۇن كەتكەن. مۇنداي ايىرماشىلىق قالاي ورىن الدى؟ بۇل جەمقورلىق ەمەس پە؟ مۇنداي تاسىلگە جول بەرگەن قىزمەتكەرلەرگە قانداي شارا قولداندىڭىزدار؟ الداعى ۋاقىتتا مۇندايدى بولدىرماۋ ءۇشىن نە ىستەيسىزدەر؟"، – دەپ ساۋال قويدى زايىتوۆ.
ونىڭ سۇراعىنا دەنساۋلىق ساقتاۋ ۆيسە-مينيسترى ەرجان شاكىر ۇلى جاۋاپ بەردى. ول بۇرىنعى جۇيەدە ادام فاكتورىنىڭ ىقپالى جوعارى بولعانىن جانە ساراپتاما مەرزىمدەرىن تاڭدامالى تۇردە قىسقارتۋ مۇمكىندىگى بولعانىن مويىندادى.
"بۇعان ۇكىمەتتىڭ ارنايى قاۋلىسى نەگىزىندە ەنگىزىلگەن "كومپوزيتتىك قىزمەت" شەشىم بولا الادى. ءقازىر بۇل قىزمەت پيلوتتىق رەجيمدە جۇزەگە اسىرىلىپ جاتىر. جۇيە تولىق سيفرلانىپ، وتىنىشتەر "ءبىر تەرەزە" قاعيداتى بويىنشا قابىلدانادى. ساراپشى مەن ءوتىنىش بەرۋشى اراسىنداعى تىكەلەي بايلانىس الىنىپ تاستالادى. رەگيستراسيالىق كۋالىك بەرۋ مەرزىمى 15 جۇمىس كۇنىنە دەيىن قىسقارادى"، – دەدى ول.
الايدا رينات زايىتوۆ مينيسترلىك وكىلىنىڭ جاۋابىنا تولىق قاناعاتتانبادى. ول ناقتى فاكتىلەر بويىنشا نە سەبەپتى كەيبىر وتىنىشتەرگە ەرەكشە كوزقاراس تانىتىلعانىن، مۇنىڭ جەمقورلىق سيپاتى بار-جوعىن جانە جاۋاپتى تۇلعالارعا قانداي شارا قولدانىلعانىن سۇراپ، قايتا ناقتىلاۋعا ءماجبۇر بولدى.
ءوز كەزەگىندە ۆيسە-مينيستر ەرجان شاكىر ۇلى:
"ساراپتامانى تاعايىنداۋ مەرزىمىندەگى ادىلەتسىزدىكتىڭ سەبەبى – پروسەستىڭ اشىق ەمەستىگى، ساراپشىنىڭ ءوتىنىش بەرۋشىمەن تىكەلەي بايلانىسى جانە ساراپتاما جۇيەسىنىڭ سيفرلانباعانى. ءقازىر بۇل ماسەلەلەر جويىلۋدا. ال ناقتى جاۋاپكەرشىلىككە تارتىلعان تۇلعالار تۋرالى اقپاراتتى جازباشا تۇردە ۇسىنۋعا رۇقسات ەتىڭىزدەر"، – دەپ تۇيىندەدى.
بۇل ماسەلە دارى-دارمەك اينالىمىنداعى اشىقتىق پەن ادىلدىككە قاتىستى قوعامنىڭ سەنىمى مەن مەملەكەتتىك باقىلاۋدىڭ ماڭىزىن تاعى ءبىر رەت العا تارتتى.
