Mekteptiń tarihy 2002 jyldan bastaý alady. Bul shańǵymen júgirý, biatlon, taý shańǵysy, shańǵymen tramplinnen sekirý, snoýbording, esý slalomy jáne jeńil atletika sekildi olimpiadalyq sport túrlerin damytýmen ainalysatyn jalǵyz respýblikalyq internat.
– Mektep-internat – bul sporttaǵy daryndy balalardy irikteý, – deidi Asqar Mojanov. – Ridder Shyǵys Qazaqstannyń qysqy sportynyń astanasy bolǵandyqtan, munda barlyq klimatyq jaǵdailar bar, sapaly qar jamylǵysy 6 aiǵa deiin saqataldy.
Ivanov jotasynyń eteginde ornalasqan shaǵyn qalaǵa Qazaqstannyń túkpir-túkpirinen balalar kelip oqidy. Búginde mektep-internat-kolledjinde elimiziń 9 óńirinen kelgen 250 bala bar.
Olardyń ishinde 80 bala qysqy sport túrleri boiynsha Olimpiadalyq daiarlaý ortalyǵynyń quramyna jáne Qazaqstan quramasyna kiredi. Balalar oqýdy 7 synypta bastaidy, sabaqtar eki tilde júrgiziledi.
– Jýyqta rolikti shańǵy boiynsha Álem chempionaty ótti, onda bizdiń mekteptiń tárbilenýshileri qola medal aldy. Sondai-aq, jeńil atletikadan da jarys ótken bolatyn, mektebimizdiń túlegi Efim Tarasov chempion atandy. Internattyń tarihy óte bai, bizdiń túlekterimiz qazir osynda jattyqtyrýshy, ustaz bolyp jumys istep júr, – dep jalǵastyrdy óz sózin Asqar Mojanov.
Balalarǵa Ridderde oqyǵan unaidy eken. Ár bapker tárbielenýshisiniń elimizdiń týyn erteń álemdik arenada kóteretinin bilgendikten, ony baptaýǵa janyn salady.
Mol tájiribesi men álemdik dańqy bar mektep basshysy da óziniń sporttyq tájiribesimen jáne chempion bolýdyń syrymen bólisip otyrady.
Onyń sózinshe, búgingi tańda mektepte balalarǵa barlyq jaǵdai jasalǵan, munda litsenziialanǵan meditsinalyq kabinetter, oqý synyptary, kitaphana, ashana, jattyqtyrý zaldary bar.
Degenmen, balalardyń medal úshin halyqaralyq deńgeide senimdi kúresýi sapaly materialdy-tehnikalyq bazany qajet etedi.
– 2017 jyly respýblikalyq biýdjetten 300 orynǵa arnalǵan eki sportzaly bar oqý korpýsynyń qurylysyna qarajat bólingen bolatyn, biraq, ókinishke orai, ol áli aiaqtalmai tur, – deidi mektep-internat-kolledjdiń direktory.
Aitýynsha, aldymen Sport jáne týrizm ministrligi saraptama júrgizýi tiis, sodan keiin ǵana nysannyń taǵdyry sheshiledi.
