Belgili aitysker aqyn Ásiia Berkenova ómirden ótti

Belgili aitysker aqyn Ásiia Berkenova ómirden ótti
Ásiia Berkenova. Foto: ashyq derekkózden

Qazaqtyń belgili aitysker aqyny, ulttyq sóz óneriniń kórnekti ókili Ásiia Berkenova 76 jasynda dúnieden ozdy. Sanaly ǵumyryn qazaq ádebieti men aitys ónerin damytýǵa arnaǵan aqynnyń qazasy ónersúier qaýym úshin aýyr habar boldy, dep habarlaidy dalanews.kz.

Ásiia Berkenova qazaq aitysynyń qaita jańǵyryp, halyq arasynda keńinen tanylýyna úles qosqan óner qairatkerleriniń biri edi. Ol sahnadaǵy tapqyrlyǵymen, ótkir oiymen jáne ulttyq qundylyqtardy dáriptegen jyrlarymen kópshiliktiń yqylasyna bólendi. Aitys dodalarynda eldik máselelerdi kóterip, qoǵamdaǵy túrli qubylystarǵa aqyndyq kózqarasyn bildirgen Ásiia Berkenova qazaqtyń sýyrypsalma ónerinde ózindik qoltańbasyn qalyptastyrdy.

Ásiia Áiipqyzy Berkenova 1950 jyly 22 sáýirde Qostanai oblysynyń Áýliekól aýdanyna qarasty Narynqol eldi mekeninde dúniege kelgen.

1972 jyly Qazaq memlekettik qyzdar pedagogikalyq institýtyn támamdap, pedagog mamandyǵyn meńgergen. Eńbek jolyn ustazdyqtan bastaǵan ol 1972-1997 jyldar aralyǵynda Qostanai oblysynyń Naýryzym jáne Áýliekól aýdandaryndaǵy mektepterde muǵalim bolyp jumys istedi.

Shirek ǵasyrǵa jýyq ýaqyt bilim salasynda eńbek etken aqyn jas urpaqqa tálim-tárbie berýmen qatar, ulttyq ónerden de qol úzgen joq. Keiin Qostanai qalasyndaǵy Memlekettik tildi jedeldete úiretý ortalyǵynda qyzmet atqardy. Sondai-aq Ahmet Baitursynuly atyndaǵy Qostanai memlekettik ýniversitetindegi "Óner" stýdiiasyna jetekshilik etip, shyǵarmashylyq baǵyttaǵy jumystarmen ainalysty.

Ásiia Berkenova 1980 jyldardan bastap aitys ónerine belsendi aralasyp, qazaqtyń sýyrypsalma aqyndyq dástúriniń damýyna eńbek sińirdi. Onyń shyǵarmashylyq joly ulttyq aitys óneri qaita jandana bastaǵan kezeńmen tuspa-tus keldi. Aqyn sahnada qarsylasyna utymdy jaýap qaitarýymen, sóz saptaý sheberligimen jáne tereń oiymen erekshelendi. Jyrlarynda el taǵdyry, ulttyq rýh, ana tili men halyqtyń rýhani qundylyqtary mańyzdy oryn aldy.

Ásiia Berkenova aitysty tek aqyndar arasyndaǵy sóz saiysy retinde emes, halyqtyń muń-muqtajyn jetkizetin óner retinde tanytýǵa úles qosty. Ustazdyq qyzmeti men shyǵarmashylyq eńbegin qatar alyp júrgen aqyn keiingi býynǵa da ónege bola bildi.