وسكەمەننىڭ ىرگەسىندەگى ريددەردى قىسقى سپورتتىڭ وتانى دەپ بەكەر اتامايدى. قالانىڭ تابيعاتىنىڭ ءوزى وسىعان بەيىمدەلگەن. ال بولاشاق چەمپيونداردى كيكبوكسينگتەن بەس دۇركىن الەم چەمپيونى اسقار موجانوۆ باسشىلىق ەتىپ وتىرعان وليمپيادالىق رەزەرۆتىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىندە دايىندايدى.

مەكتەپتىڭ تاريحى 2002 جىلدان باستاۋ الادى. بۇل شاڭعىمەن جۇگىرۋ، بياتلون، تاۋ شاڭعىسى، شاڭعىمەن ترامپليننەن سەكىرۋ، سنوۋبوردينگ، ەسۋ سلالومى جانە جەڭىل اتلەتيكا سەكىلدى وليمپيادالىق سپورت تۇرلەرىن دامىتۋمەن اينالىساتىن جالعىز رەسپۋبليكالىق ينتەرنات.

– مەكتەپ-ينتەرنات – بۇل سپورتتاعى دارىندى بالالاردى ىرىكتەۋ، – دەيدى اسقار موجانوۆ. – ريددەر شىعىس قازاقستاننىڭ قىسقى سپورتىنىڭ استاناسى بولعاندىقتان، مۇندا بارلىق كليماتىق جاعدايلار بار، ساپالى قار جامىلعىسى 6 ايعا دەيىن ساقاتالدى.

يۆانوۆ جوتاسىنىڭ ەتەگىندە ورنالاسقان شاعىن قالاعا قازاقستاننىڭ تۇكپىر-تۇكپىرىنەن بالالار كەلىپ وقيدى. بۇگىندە مەكتەپ-ينتەرنات-كوللەدجىندە ەلىمىزىڭ 9 وڭىرىنەن كەلگەن 250 بالا بار.

ولاردىڭ ىشىندە 80 بالا قىسقى سپورت تۇرلەرى بويىنشا وليمپيادالىق دايارلاۋ ورتالىعىنىڭ قۇرامىنا جانە قازاقستان قۇراماسىنا كىرەدى. بالالار وقۋدى 7 سىنىپتا باستايدى، ساباقتار ەكى تىلدە جۇرگىزىلەدى.

– جۋىقتا روليكتى شاڭعى بويىنشا الەم چەمپيوناتى ءوتتى، وندا ءبىزدىڭ مەكتەپتىڭ تاربيلەنۋشىلەرى قولا مەدال الدى. سونداي-اق، جەڭىل اتلەتيكادان دا جارىس وتكەن بولاتىن، مەكتەبىمىزدىڭ تۇلەگى ەفيم تاراسوۆ چەمپيون اتاندى. ينتەرناتتىڭ تاريحى وتە باي، ءبىزدىڭ تۇلەكتەرىمىز ءقازىر وسىندا جاتتىقتىرۋشى، ۇستاز بولىپ جۇمىس ىستەپ ءجۇر، – دەپ جالعاستىردى ءوز ءسوزىن اسقار موجانوۆ.

بالالارعا ريددەردە وقىعان ۇنايدى ەكەن. ءار باپكەر تاربيەلەنۋشىسىنىڭ ەلىمىزدىڭ تۋىن ەرتەڭ الەمدىك ارەنادا كوتەرەتىنىن بىلگەندىكتەن، ونى باپتاۋعا جانىن سالادى.

مول تاجىريبەسى مەن الەمدىك داڭقى بار مەكتەپ باسشىسى دا ءوزىنىڭ سپورتتىق تاجىريبەسىمەن جانە چەمپيون بولۋدىڭ سىرىمەن ءبولىسىپ وتىرادى.

ونىڭ سوزىنشە، بۇگىنگى تاڭدا مەكتەپتە بالالارعا بارلىق جاعداي جاسالعان، مۇندا ليسەنزيالانعان مەديسينالىق كابينەتتەر، وقۋ سىنىپتارى، كىتاپحانا، اسحانا، جاتتىقتىرۋ زالدارى بار.

دەگەنمەن، بالالاردىڭ مەدال ءۇشىن حالىقارالىق دەڭگەيدە سەنىمدى كۇرەسۋى ساپالى ماتەريالدى-تەحنيكالىق بازانى قاجەت ەتەدى.

– 2017 جىلى رەسپۋبليكالىق بيۋدجەتتەن 300 ورىنعا ارنالعان ەكى سپورتزالى بار وقۋ كورپۋسىنىڭ قۇرىلىسىنا قاراجات بولىنگەن بولاتىن، ءبىراق، وكىنىشكە وراي، ول ءالى اياقتالماي تۇر، – دەيدى مەكتەپ-ينتەرنات-كوللەدجدىڭ ديرەكتورى.

ايتۋىنشا، الدىمەن سپورت جانە تۋريزم مينيسترلىگى ساراپتاما جۇرگىزۋى ءتيىس، سودان كەيىن عانا نىساننىڭ تاعدىرى شەشىلەدى.