Rıdder qalasyndaǵy «Sınegore» demalys bazasynda úsh kúnge sozylǵan respýblıkalyq «Assambleıa Jastary» lageri – «ETNO WINTER CAMP» ótti. Bul shara eldiń túkpir-túkpirinen kelgen belsendiler men eriktilerge ózara tájirıbe almasyp, jańa bilim alý múmkindigin syılady,- dep habarlaıdy Dalanews.kz
Lagerge Almaty, Shymkent qalalary men Almaty, Atyraý, Jambyl, Qaraǵandy, Túrkistan, Qostanaı, Shyǵys Qazaqstan jáne Abaı oblystarynan kelgen «Assambleıa Jastary» uıymynyń belsendileri qatysty.
Bıylǵy kezdesý Qazaqstan halqy Assambleıasynyń 30 jyldyǵy men Alǵys aıtý kúnine oraılastyryldy. Úsh kún boıy qatysýshylar tanymdyq jáne oıyn-saýyqtyq baǵdarlamalarǵa belsene atsalysty.
"Lager erekshe áserli ótýde. Ujymdyq jumysqa baýlıtyn trenıńter, sheshendik ónerdi damytý sabaqtary, qyzyqty sheberlik saǵattary – munyń bári Shyǵys Qazaqstannyń kórkem jerinde, «Sınegore» demalys bazasynda uıymdastyryldy! Men kóptegen talantty jastarmen tanystym. Biz óńirlerdegi ekologıalyq, patrıottyq, qaıyrymdylyq sharalaryn uıymdastyrý tájirıbesimen bólisip, jańa ıdeıalarmen shabyttandyq. Bul kezdesýlerimiz áli de jalǵasyn tabady dep senemin!", – dedi Jambyl oblysynan kelgen «Assambleıa Jastary» múshesi Ázıza Ismanova.
Kezdesýler men ınteraktıvti trenıńterdiń negizgi bóligi nashaqorlyq, alkogól jáne qumar oıyndarǵa táýeldiliktiń aldyn alý taqyrybyna arnaldy. Jastarǵa zıandy ádetterden qalaı saqtaný kerektigi jáne táýeldi adamdarǵa qandaı kómek kórsetýge bolatyny jóninde tájirıbeli psıholog-trenerler keńes berdi.
Sondaı-aq, tabysty kásipker Mıhaıl Lýnev jas qatysýshylarǵa óz kásibin ashý jóninde praktıkalyq semınar ótkizip, kásipkerlik qabiletterdi damytýǵa kómektesetin ádebıetterdi usyndy.
Lagerdiń basty qonaqtarynyń biri – otandyq akter, Qazaqstan halqy Assambleıasynyń belsendisi, dombyrashy-aqyn Danıel Djeıms boldy.
Lagerdiń jabylý saltanatyna İshki saıasat basqarmasynyń basshysy Ernur Býrahan men Rıdder qalasy ákiminiń orynbasary Qanybek Tóleýhanov qatysyp, jastardy tolǵandyrǵan ekologıa, týrızmdi damytý jáne basqa da mańyzdy suraqtarǵa jaýap berdi.
Bul shara jastardyń birigýine, jańa bastamalardy damytýǵa jáne ulttyq birlikti nyǵaıtýǵa baǵyttalǵan mańyzdy qadam boldy.
