Shyǵys Qazaqstan oblysynyń ákimi Nurymbet Saqtaǵanov jumys saparymen Ridder qalasynda boldy. Ol jylý júiesiniń jumysyn tekserip, sý tasqynyna daiyndyq barysymen tanysty. Negizgi máseleler – jylý jelilerin jańartý, qalalyq infraqurylymnyń jaǵdaiy jáne kóktemgi sý basýdyń aldyn alý sharalary.
Qazir qalada eki negizgi jylý kózi bar: «Shyǵys jylý» AQ-nyń Ridder JEO filialy jáne «L-TVK» JShS qazandyǵy. Olardy jańǵyrtý – biliktiń basty mindetteriniń biri.
Sońǵy eki jylda JEO aimaq balansyna ótkennen keiin úlken jumystar atqaryldy: jabdyqtar jańartylyp, 19 shaqyrym jylý jelisi qalpyna keltirildi. Bul qala turǵyndaryna jylý berý sapasyn jaqsartýǵa múmkindik berdi. Nurymbet Saqtaǵanov oń ózgeristerdi atap ótti:
– Nóldik qabat retke keltirildi. Qazir stantsiia 11 megavatt elektr energiiasyn óndirýde, jaqyn arada bul kórsetkish eki-úsh esege deiin artady. JEO-nyń ishki rezervteri ekonomikalyq tiimdilikti edáýir arttyrýǵa múmkindik beredi, biz kompaniia basshylyǵymen birlese jumys isteýdi jalǵastyramyz, – dedi oblys ákimi.
Sonymen qatar kadr tapshylyǵy máselesi sheshilmek. Biyl respýblikada Jumysshy mamandyqtar jyly jariialandy, sondyqtan energetika jáne ónerkásip salasynyń mamandaryna memleket tarapynan jan-jaqty qoldaý kórsetiledi. Oblys JEO-da jumys isteýge nietti azamattardy «Otbasy bank» arqyly baspanamen qamtamasyz etýge daiyn. Qajet bolǵan jaǵdaida jumys istep júrgen mamandar qaita daiarlaýdan ótedi.
«L-TVK» JShS qazandyǵy – qalany jylý jáne sýmen qamtamasyz etetin taǵy bir mańyzdy nysan. Ol Qarajyra kenishiniń kómirimen jumys isteidi, qazirgi ýaqytta bes sý jylytý qazandyǵy paidalanylady. Alaida 2001 jyly qurylǵanyna qaramastan, kásiporynnyń qazirgi jaǵdaiy máz emes – ony kútip ustaýǵa jáne jóndeýge qarajat jetkiliksiz.
– Biz «Qaztsink» JShS jáne «L-TVK» basshylyǵymen qazandyq pen sý tartý nysanyn jergilikti atqarýshy organdar balansyna berý týraly kelisimge keldik. Bul másele úshjaqty kelissózder barysynda qaralyp, ońtaily sheshim qabyldanady. Qazirgi kezde jylý jelileriniń jaǵdaiy óte nashar, sondyqtan olardy tez arada balansqa alyp, qaita jańǵyrtý kerek, – dep atap ótti oblys ákimi.
Sapar barysynda sý tasqynyna daiyndyq máseleleri de talqylandy. Nurymbet Saqtaǵanov «LKGES» JShS-nyń muz jiberý kanalynyń tazalyǵyn baqylaýdy jáne aryqtar men kanaldardyń, ásirese Botanika yqsham aýdanyndaǵy jaǵdaidy qadaǵalaýdy tapsyrdy.
Ridderde jylý júiesin jańǵyrtý jáne sý tasqynynyń aldyn alý jumystary jalǵasady. Jergilikti bilik josparlanǵan barlyq sharalardyń oryndalýyn baqylaýda ustaityn bolady.
