Shymkent qalasy ákiminiń orynbasary Rýslan Berdenov Respublica partiiasynyń teńtóraǵasy qyzmetin endi atqarmaidy. Bul aqparatty partiianyń baspasóz qyzmeti rastady, dep habarlaidy Dalanews.kz Kazinform agenttigine silteme jasap.
Rýslan Berdenov biyl 24 aqpanda Shymkent qalasy ákiminiń orynbasary qyzmetine taǵaiyndaldy. Osy laýazymǵa kelgen soń, ol Májilis depýtaty retindegi ókilettigin toqtatty.
Eske sala keteiik, 21 sáýirde Rýslan Berdenovke qastandyq jasalǵan edi. Ol aýyr jaraqat alyp, aýrýhanaǵa jetkizildi jáne oǵan shuǵyl túrde ota jasaldy.
Kúni keshe atalǵan oqiǵaǵa bailanysty qozǵalǵan qylmystyq is boiynsha tergeý aiaqtalǵany belgili boldy.
Qala ákimdiginiń málimetinshe, Rýslan Berdenov ázirge jumysqa kirisken joq. Ýaqytsha Shymkent qalasy ákiminiń orynbasary qyzmetin birinshi orynbasar Qýanysh Asylov atqarýda.
