QR Premer-Ministriniń birinshi orynbasary Roman Skliar Qaraǵandy oblysyna jumys sapary barysynda uzyndyǵy 363 km bolatyn «Qaraǵandy – Balqash» avtojolyn rekonstrýktsiialaý jumysy barysymen tanysty.
Qazirgi sátte merdiger kompaniia jol jabynynyń joǵarǵy qabatyn tósep jatyr.
«QazAvtoJol» UK» AQ Qaraǵandy oblystyq filialynyń direktory Erlan Jumaǵulov avtojoldyń tutas boiynda ainalyp ótetin jer joq ekenin jáne kólik quraldary qozǵalysy qalypty jaǵdaida júrip jatqanyn baiandady.
Jumabek, Aqsý, Aqshataý, Aqsý-Aiýly eldi mekenderi men Balqash qalasy úshin bes ainalma jol salyndy. Merdiger Balqash qalasynyń irgesindegi temirjol arqyly ótetin ótkel men jol airyǵy qurylysyn aiaqtady.
Aýyl sharýashylyǵy tehnikasynyń ótýi úshin 32 jol ótpesi jáne 11 kópir salyndy. Qoldanystaǵy injenerlik kommýnikatsiia jelileri qaitadan júrgizildi.
Avtojoldaǵy jumys kezeń-kezeńimen júzege asýda: tosqaýyl qorshaýlar ornatylyp, qardan qorǵaityn qorshaýlar men mal ótkizbeitin qorshaýlar salyndy. Demalys alańdaryn jasaý boiynsha jumys júrgizilip jatyr. 18 demalys alańynyń ishinde modýldik úlgidegi 8 sanitarlyq-gigienalyq torap bar. Aialdap otyratyn arnaiy oryndar men avtokólikterdi jóndeýge arnalǵan estakadalar qarastyrylǵan.
Roman Skliar «Qaraǵandy–Balqash» avtojolynyń «Ortalyq–Ońtústik» kólik dálizin damytý úshin mańyzy zor ekenin atap ótip, jol-qurylys jumystarynyń qarqynyn tómendetpeýdi jáne joldy rekonstrýtsiialaýdy jyl sońyna deiin aiaqtaýdy tapsyrdy.
Sondai-aq jumys sapary barysynda birinshi vitse-premer Balqash qalasynda jylytý maýsymyna daiyndyqty tekserdi. Ol jylý jelileri men qalalyq JEO-nyń qaita jańartylatyn ýchaskelerimen tanysty
2021 jyldan bastap qalada uzyndyǵy 10,6 km magistraldyq jylý jelilerine rekonstrýktsiia júrgizilip jatyr. Jumysty biyl aiaqtaý josparlanyp otyr, bul qaladaǵy jylýmen jabdyqtaý sapasyn jaqsartýǵa múmkindik beredi. Ishki magistraldyq jáne oramishilik jylý jelilerin jańartý boiynsha jumys júrgizilýde. Barlyǵy 25 km jylý jelileri aýystyrylady.
Birinshi vitse-premerge barlyq jumys ótken jylytý maýsymynda úzilis baiqalǵan jylý magistraliniń osal ýchaskelerinde júrgizilip jatqany týraly habarlandy.
Balqash JEO-da Roman Skliarǵa jańa, besinshi qazandyqtyń qurylysy jaiynda baiandaldy, ondaǵy montajdaý jumysy 2026 jyldyń sońyna deiin aiaqtalady dep josparlanýda.
Stansa jabdyqtaryn jóndep, jańǵyrtýǵa 2,6 mlrd teńge bólindi. Úsh qazandyq pen eki týrbinaǵa aǵymdaǵy jóndeý jumysy aiaqtaldy. Taǵy bir qazandyq pen týrbinany kúrdeli jóndeý josparlanyp otyr.
Jylytý maýsymynyń basynda JEO tórt qazandyqpen jumys isteitin bolady, bul turǵyndardy turaqty jylýmen qamtamasyz etedi.
