رومان سكليار «قاراعاندى – بالقاش» اۆتوجولىن رەكونسترۋكسيالاۋدى جىل سوڭىنا دەيىن اياقتاۋدى تاپسىردى

جاربول كەنت ۇلى 22 ماۋ. 2024 18:21 2442

ق ر پرەمەر-مينيسترىنىڭ ءبىرىنشى ورىنباسارى رومان سكليار قاراعاندى وبلىسىنا جۇمىس ساپارى بارىسىندا ۇزىندىعى 363 كم بولاتىن «قاراعاندى – بالقاش» اۆتوجولىن رەكونسترۋكسيالاۋ جۇمىسى بارىسىمەن تانىستى.

قازىرگى ساتتە مەردىگەر كومپانيا جول جابىنىنىڭ جوعارعى قاباتىن توسەپ جاتىر. 

«قازاۆتوجول» ۇك» اق قاراعاندى وبلىستىق فيليالىنىڭ ديرەكتورى ەرلان جۇماعۇلوۆ اۆتوجولدىڭ تۇتاس بويىندا اينالىپ وتەتىن جەر جوق ەكەنىن جانە كولىك قۇرالدارى قوزعالىسى قالىپتى جاعدايدا ءجۇرىپ جاتقانىن باياندادى.

جۇمابەك، اقسۋ، اقشاتاۋ، اقسۋ-ايۋلى ەلدى مەكەندەرى مەن بالقاش قالاسى ءۇشىن بەس اينالما جول سالىندى. مەردىگەر بالقاش قالاسىنىڭ ىرگەسىندەگى تەمىرجول ارقىلى وتەتىن وتكەل مەن جول ايرىعى قۇرىلىسىن اياقتادى.

اۋىل شارۋاشىلىعى تەحنيكاسىنىڭ ءوتۋى ءۇشىن 32 جول وتپەسى جانە 11 كوپىر سالىندى. قولدانىستاعى ينجەنەرلىك كوممۋنيكاسيا جەلىلەرى قايتادان جۇرگىزىلدى.

اۆتوجولداعى جۇمىس كەزەڭ-كەزەڭىمەن جۇزەگە اسۋدا: توسقاۋىل قورشاۋلار ورناتىلىپ، قاردان قورعايتىن قورشاۋلار مەن مال وتكىزبەيتىن قورشاۋلار سالىندى. دەمالىس الاڭدارىن جاساۋ بويىنشا جۇمىس جۇرگىزىلىپ جاتىر. 18 دەمالىس الاڭىنىڭ ىشىندە مودۋلدىك ۇلگىدەگى 8 سانيتارلىق-گيگيەنالىق توراپ بار. ايالداپ وتىراتىن ارنايى ورىندار مەن اۆتوكولىكتەردى جوندەۋگە ارنالعان ەستاكادالار قاراستىرىلعان.

رومان سكليار «قاراعاندى–بالقاش» اۆتوجولىنىڭ «ورتالىق–وڭتۇستىك» كولىك ءدالىزىن دامىتۋ ءۇشىن ماڭىزى زور ەكەنىن اتاپ ءوتىپ، جول-قۇرىلىس جۇمىستارىنىڭ قارقىنىن تومەندەتپەۋدى جانە جولدى رەكونسترۋسيالاۋدى جىل سوڭىنا دەيىن اياقتاۋدى تاپسىردى.

سونداي-اق جۇمىس ساپارى بارىسىندا ءبىرىنشى ۆيسە-پرەمەر بالقاش قالاسىندا جىلىتۋ ماۋسىمىنا دايىندىقتى تەكسەردى. ول جىلۋ جەلىلەرى مەن قالالىق جەو-نىڭ قايتا جاڭارتىلاتىن ۋچاسكەلەرىمەن تانىستى

2021 جىلدان باستاپ قالادا ۇزىندىعى 10،6 كم ماگيسترالدىق جىلۋ جەلىلەرىنە رەكونسترۋكسيا جۇرگىزىلىپ جاتىر. جۇمىستى بيىل اياقتاۋ جوسپارلانىپ وتىر، بۇل قالاداعى جىلۋمەن جابدىقتاۋ ساپاسىن جاقسارتۋعا مۇمكىندىك بەرەدى. ىشكى ماگيسترالدىق جانە ورامىشىلىك جىلۋ جەلىلەرىن جاڭارتۋ بويىنشا جۇمىس جۇرگىزىلۋدە. بارلىعى 25 كم جىلۋ جەلىلەرى اۋىستىرىلادى.

ءبىرىنشى ۆيسە-پرەمەرگە بارلىق جۇمىس وتكەن جىلىتۋ ماۋسىمىندا ءۇزىلىس بايقالعان جىلۋ ماگيسترالىنىڭ وسال ۋچاسكەلەرىندە جۇرگىزىلىپ جاتقانى تۋرالى حابارلاندى. 

بالقاش جەو-دا رومان سكليارعا جاڭا، بەسىنشى قازاندىقتىڭ قۇرىلىسى جايىندا باياندالدى، ونداعى مونتاجداۋ جۇمىسى 2026 جىلدىڭ سوڭىنا دەيىن اياقتالادى دەپ جوسپارلانۋدا.

ستانسا جابدىقتارىن جوندەپ، جاڭعىرتۋعا 2،6 ملرد تەڭگە ءبولىندى. ءۇش قازاندىق پەن ەكى تۋربيناعا اعىمداعى جوندەۋ جۇمىسى اياقتالدى. تاعى ءبىر قازاندىق پەن تۋربينانى كۇردەلى جوندەۋ جوسپارلانىپ وتىر.

جىلىتۋ ماۋسىمىنىڭ باسىندا جەو ءتورت قازاندىقپەن جۇمىس ىستەيتىن بولادى، بۇل تۇرعىنداردى تۇراقتى جىلۋمەن قامتاماسىز ەتەدى.


ۇسىنىلعان
سوڭعى جاڭالىقتار