Onyń aitýynsha, buǵan deiin odaqqa múshelikke kirýge ótinish bilgenderdiń jas erekshelikterine shekteý qoiylyp kelse, endi ondai talap bolmaidy. Bul elimizde jańa qalamgerler esimin qalyptastyrýǵa múmkindik bermek.
– Buryn Jazýshylar odaǵynda jastardyń úles salmaǵy múlde az bolatyn, – deidi aqyn Beibit Sarybai. – Keiingi bes jyldyqta olardyń sany kóbeigen. Jańa basshylyq quram «suranysqa sai, jastardyń usynysyna da ashyqpyz» dep otyr. Sondai-aq qazirgi qazaq ádebietine bet buryp kele jatqan jastar arasyndaǵy kemshin tustarǵa da toqtaldy.
– Jastardyń romanǵa barýy neken-saiaq. Mysaly, jiyrma jastyń bireýi, tipti elýiniń bireýi romanǵa barýy múmkin. Bir jylda kem degende 5 jas jazýshynyń roman jazýyna jaǵdai jasaǵymyz kelip otyr jáne soǵan bir sebepker bolsaq deimiz. Jastarmen sanasyp, talap-tilegin eskerip, quqyǵyn qorǵaý kerek, – deidi Qazaqstan Jazýshylar odaǵy basqarma tóraǵasynyń orynbasary Beibit Sarybai.
Al ádebiet synshysy Ámirhan Meńdeke odaq jumysyn ońtailandyrý úshin ádebi qordy qaita qurý kerek ekenin aitty. Onyń aitýynsha, buryn jumys istegen bul júie talai jas jazýshyǵa áleýmettik qoldaý kórsetken. Keiingi jyldary qor jumysy turalap qalǵanyn aitty.
– Ádebi qordy qaitadan jasaqtap, jańartyp, qurý kerek. Onyń mehanizmderiniń bári belgili. Al jańadan sailanǵan tóraǵa Mereke Qulkenov tájirbieli jazýshy jáne biznesten de habary mol. Eger ol qolǵa alsa, ádebi qordy qaita quryp, isin jandandyrady degenge senimim mol, – dedi jazýshy, ádebiet synshysy Ámirhan Meńdeke.
«Qalam – kieli qundylyq. Sóz qudireti halyqty ydyrata da, biriktire de alady» degen Prezident Qasym-Jomart Toqaev qazaq ádebietiniń kenje qalyp qoimai, kósh ilgeri damyp otyrý kerek ekenin óz reformasynda talai tilge tiek etken edi.
– Úkimet pen memlekettik mekemeler arasynda birneshe jumys jasalyp jatyr. Al ádebiettiń damýy halyqtyń igiligine jumsalady. Sol baǵytta kóp joba jasalyp jatyr, – dedi Qazaqstan Jazýshylar odaǵy basqarma tóraǵasynyń orynbasary, aqyn Ǵalym Qalibekuly.
El bolyp atsalysqan jańa reformanyń qabyldanǵanyna bir jylǵa jýyqtady. Jazýshy, Qazaqstan Jazýshylar odaǵynyń basqarma tóraǵasy Mereke Qulkenov «az ýaqytta atqarylǵan sharýa kóp» deidi. Onyń aitýynsha, Prezident bekitken reforma bir jyldyq jumys emes. Ol – ár sala mamandarynyń qajyrly eńbegi men súbeli nátijesiniń jemisi.
– Jańa Qazaqstandy qurý máselesindegi úlken qujat. Bir jyl boldy, talai dúnie jasalyp jatyr. Úkimet pen halyq arasyndaǵy alshaqtyq jaqyndap keledi. Burynǵy ketken qatelikterdi túzetý, shetelge ketken qarjy, qoldy bolǵan nysandar, igerilmegen jer syndy máseleler sheshimin taýyp jatyr. Munyń bári kim úshin kerek? Árine, qazaq degen halyqqa kerek, – dedi Qazaqstan Jazýshylar odaǵynyń basqarma tóraǵasy, jazýshy Mereke Qulkenov.
Ár saladaǵy ózgeris, saiasi ómirdegi jańashyldyq – Prezident pármeniniń iske asyp jatqanynyń aiqyn dáleli.
