Alataý aýdany ákimi Shahmerden Ryspaevtiń nazaryna!
8 naýryz áielder kúni – kóńildi merekelerdiń biri. Dál osy kúni alburtqan kóńilimizge kirbiń uialatqan jaittar da kezdeskenin jasyryp qaitemiz.
Qoisha qýdy
Mereke jaqyndaǵanda Almatynyń kóshelerinde gúl satýshylar kóbeiedi. Qai kósheniń boiymen júrseńiz de qushaq-qushaq gúl satqan jurt kózińizge ottai basylady.
Birden aitaiyq, halyq kóp júretin Rysqulov kóshesiniń boiynda jurttyń birneshe kún boiyna gúl satýyna Alataý aýdany ákimdigi ruqsat bergen.
Úiimizdegi otanasyn quttyqtaý úshin biz de Rysqulov kóshesiniń boiyna kóligimizdi toqtatyp, gúl tańdai bastaǵanda, jol politsiiasy qyzmetkerleri «migalkasyn» jarqyldatyp, orys tilinde «kólikterińdi jol boiynan áketińder» dep jurtty qoisha qýalamasy bar ma?!
Iá, jol boiynda gúl saýdalaýdyń zańǵa qaishy ekenin bilemiz. Biraq búgin mereke emes pe?
Jol saqshylary kóligin jol boiynan almaǵandardyń temir tulparyn aiyppul turaǵyna toǵytamyz degennen keiin gúl satyp alýǵa kelgen jurttyń bári tura qashty.
Osylaisha politsiia qyzmetkerleri áp-sátte júzdegen adamnyń kóńil-kúiin sý sepkendei basyp tastaǵanyna kýá boldyq. Budan neni ańǵarýǵa bolady?
Óz basymyz osy bir qarapaiym oqiǵadan bizdegi jol saqshylarynyń mádeni deńgeiiniń qanshalyqty ekenin ańǵarǵandaimyz.
Alataý aýdany ákimdigi qaida qarap otyr?
Júzdegen adamǵa gúl satýǵa ruqsat bergen Alataý aýdany ákimdiginiń qyzmetkerleri gúl satýshylar men satyp alýshylardyń qaýipsizdigin nege oilamaǵanyn taǵy túsine almadyq.
Eger olar qala turǵyndarynyń qaýipsizdigin oilasa, Almaty qalalyq Ishki ister basqarmasymen birlesip, birineshe jol saqshysyn tartyp, Rysqulov kóshesiniń boiyndaǵy gúl satyp alyp jatqan halyqtyń qaýipsizdigin qamtamasyz etýge bolar edi ǵoi.
Ádette Almatynyń keń kóshelerinde aýylsharýashylyǵy jármeńkesin uiymdastyrǵanda jol politsiia qyzmetkerleri joldyń bas-aiaǵyn jaýyp, halyqtyń alańsyz jármeńke aralap, saýda jasaýyna jaǵdai jasaitynyn bilemiz. Dál osyndai tirlikti Alataý aýdany ákimi Shahmerden Ryspaev bastaǵan sheneýnikter nege uiymdystyrmaidy?
8 naýryzda Rysqulov kóshesiniń boiynan gúl alýǵa barǵanymyzda mundai salaýatty tirlikti baiqamadyq. Esesine gúl alýǵa kelgen jurtty qoisha qýǵan jol saqshylarynyń áreketin kórip qarnymyz ashty.
Bále-jala aiaq astynda
Qudai betin ary qylsyn, eger Rysqulov kóshesiniń boiymen júitkigen bireý rólge ie bola almai nópir halyqty qaqsa, onda zamatta otyz shaqty adam mert bolatynyn biz aitpasaq-ta túsinip otyrǵan shyǵarsyzdar.
Bizdińshe, ákimdik qyzmetkerleri halyqtyń qaýipsizdigin múlde oilamaǵan. Oilasa birneshe kúnnen beri gúl satatyn bazarǵa ainalǵan Rysqulov kóshesiniń boiynda jol saqshylary, jedel járdem, órt sóndirý máshineleri oqys oqiǵanyń aldyn alý úshin saqadai sai turar edi ǵoi.
Mereke kezinde biraz halyqtyń gúl satyp, bir ailyq nápaqasyn taýyp alǵanyna qarsylyǵymyz joq. Kez kelgen mereke kásipkerlikke dem beretin qozǵaýshy kúsh ekenin túsinemiz. Biraq eki-úsh kúndik saýda oryndaryn uiymdastyrǵanda jergilikti bilik oryndarynyń halyqtyń qaýipsizdigine de basa mán berýi kerek edi.
Ádette elimizdegi at tóbelindei oppozitsiia «Saryarqa» kinoteatrynyń artynda miting ótkizgende Almatynyń búkil politsiiasy jinalyp, halyqtyń «qaýipsizdigin» qamtamasyz etetinin bilemiz.
Bolmasa, «Almaty Arenaǵa» sheteldiń ánshileri kelip kontsert qoiǵanda júzdegen saqshylar, kýrsanttar árbir 10 metr saiyn tik turyp, jurttyń qaýipsizdigin qamtamasyz etpeýshi me edi?
Aldaǵy jyly Alataý aýdany ákimdigi 8 naýryz kezinde Rysqulov boiyndaǵy osy «tirlikti» rettep, gúl satýshy men satyp alýshylardyń qaýipsizdigin qamtamasyz etse eken degen tilegimiz bar.
Nurlan JUMAHAN, jýrnalist, bloger
https://dalanews.kz/26138
