Qazir qazaq tilinde «Qazaq radiosy» men «Juldyz FM» radiosy ǵana habar taratady. Qalǵandarynyń bári Reseidiń radiosy siiaqty. Radiolar shoý-biznestiń jyryn jyrlap, kúiin kúitteýde.
Bilik bolsa, olarǵa kóńil bólip jatqan joq. Elimizde qoǵamdyq-saiasi ómirinde eleýli ózgerister bolmaǵan soń, radiolar elimizdiń aqparat aidynynda zákirin tastap, uzaq ýaqytqa toqtaǵan kemeni kóz aldyńyzǵa elestetedi.
Búginde radio – shoý-biznesti nasihattaityn basty qural. Biraq radiolarymyz qazaqtyń shoý-biznesin nasihattap jatqan joq. Kópshiligi orys pen batystyń ánshilerin nasihattaidy. Al ánshilerimiz bolsa, bul máseleni kótergen emes.
Sailaý men jer daýy syndy máseleler týyndaǵanda múiizi qaraǵaidai ánshilerimiz – Eskendir Hasanǵaliev, Bibigúl Tólegenova, Roza Rymbaeva jurtqa basý aityp, bilik partiiasyna daýys berýdi aitýdy ǵana biledi.
Al elimizdegi radiolar 20 jyldan asa orys pen batystyń mádenietin nasihattaǵanda olardyń eshqaisysy «bularyń qalai?» dep bas kótergen joq. Eger olar ózderin qazaq mádenietiniń janashyry sanasa, nege orystildi radiolarmen kúrespeidi?
Keńes dáýirinde orystarǵa jaltaqtap qalǵan óner adamdary qazaq tili úshin kúrespeitinine tolyqtai kózimiz jetti. Qaita olardan góri ulttyq máselege kelgende tabandylyq tanytyp júrgen Sáken Maiǵaziev, Bekjan Turys, Qaldybek Qurmanáli syndy azamattarǵa ǵana senim artýǵa bolatyndai.
Sondyqtan Sáken Maiǵaziev bastaǵan qazaq ánshileri elimizdegi radiolardyń qazaq tilinde habar taratyp, án berýin batyl túrde talap etetin kez jetti.
Elimiz táýelsizdik alǵaly beri úzdiksiz habar taratyp kele jatqan «Retro FM» radiosy tek qana ózge eldiń eski ánderin qoiady. Qazaqstanǵa kelgen sheteldik azamat kúndiz «Retro FM» radiosyn tyńdasa, qazaqta buǵan deiin án bolmaǵan ba dep oilap qalýy múmkin.
Óz basym atalǵan radioda Shámshi ánderin efirlerinen bergenin estigen emespin. El uiqyǵa ketkende qazaq tilindegi ánderdi beretinin bilemiz. Al jurt tyńdaityn ýaqyttarda atalamysh radio qazaq ánderin múlde efirge jibermeidi.
Sonda Shámshiniń kóńil shalqytqan ánderin tyńdaý úshin saǵat tiliniń túngi 12 asqanyn kútip otyrýymyz kerek pe? Endi mundai kózboiaýshylyqqa tózýge bolmaidy. Óitkeni, biyl el Táýelsizdigine 25 jyl. Muny olarǵa aitý kerek. Uiattary bar shyǵar.
Dál osy máselemen Shámshi murasyn nasihattap júrgen Qaldybek Qurmanáli kóterýi kerek. Eger joǵaryda qazaq ónerine jany aýyratyn azamattar bolsa Qaldybek Qurmanálini «Retro FM» direktorlyǵyna usyný kerek. Qaldyekeń bir-aq kúnde eski ánderdi beretin radiodaǵy didjeilerdiń tilin qazaqshaǵa keltirip, «Retro FM» radiosyn qazaqtyń mol murasyn nasihattaityn aqparat quralyna ainaldyratynyna senimdimin.
Árine, biz aitty eken dep «Retro FM» radiosynyń tizginin Qaldybek Qurmanálige tapsyra salmasy anyq. Sondyqtan bul baǵytta Qaldybek Qurmanáli, Sáken Maiǵaziev syndy óner janashyrlary ózderi kúres júrgizýi kerek. Eger olar bul baǵytta batyl talap qoiatyn bolsa, qazaqtildi aýditoriia olardy tolyqtai qoldaitynyna senimdimin.
Jalpy, bul máseleni kez kelgen jýrnalist kóterip, jazýyna bolady. Biraq olar shoý-biznestiń tóńireginde júrgen azamattardai tanymal emes. Sondyqtan qazaq ánshileri orys pen batystyń mádenietin nasihttap júrgen radiolarmen kúresýi kerek. Bul rette Sáken men Qaldybek aǵamyzdy beker aýyzǵa alyp otyrǵan joqpyz. Sáken buǵan deiin qazaq tili úshin kúresip, oiyn ashyq aityp, jurtqa ultjanashyry retinde tanyldy. Al sazger, jýrnalist Qaldybek Qurmanáli búginde bir radiony emes, birneshe radiony basqaratyndai tájiribe jinaǵan azamat. Eger Qaldyekeń qaisar minezine salsa, orystildi radiolardy tezge salatyn kúsh-qýaty bar.
Nurlan ÁÝBÁKIR
