«رەترو FM» ءشامشى اندەرىن نەگە قويمايدى؟!

Dalanews 26 تام. 2016 03:11 519

تاۋەلسىزدىك العانىمىزعا 25 جىل. ءبىراق راديولاردى تىڭداساڭىز، تاۋەلسىزدىككە ەندى عانا قول جەتكىزىپ جاتقانداي كۇي كەشەسىز. راديولاردىڭ كوپشىلىگى ورىس تىلىندە حابار تاراتادى.  

ءقازىر قازاق تىلىندە «قازاق راديوسى» مەن «جۇلدىز FM» راديوسى عانا حابار تاراتادى. قالعاندارىنىڭ ءبارى رەسەيدىڭ راديوسى سياقتى. راديولار شوۋ-بيزنەستىڭ جىرىن جىرلاپ، كۇيىن كۇيتتەۋدە.

بيلىك بولسا، ولارعا كوڭىل ءبولىپ جاتقان جوق. ەلىمىزدە قوعامدىق-ساياسي ومىرىندە ەلەۋلى وزگەرىستەر بولماعان سوڭ، راديولار ەلىمىزدىڭ اقپارات ايدىنىندا زاكىرىن تاستاپ، ۇزاق ۋاقىتقا توقتاعان كەمەنى كوز الدىڭىزعا ەلەستەتەدى.

بۇگىندە  راديو – شوۋ-بيزنەستى ناسيحاتتايتىن باستى قۇرال. ءبىراق راديولارىمىز قازاقتىڭ شوۋ-بيزنەسىن ناسيحاتتاپ جاتقان جوق. كوپشىلىگى ورىس پەن باتىستىڭ انشىلەرىن ناسيحاتتايدى. ال انشىلەرىمىز بولسا، بۇل ماسەلەنى كوتەرگەن ەمەس.

سايلاۋ مەن جەر داۋى سىندى ماسەلەلەر تۋىنداعاندا ءمۇيىزى قاراعايداي انشىلەرىمىز – ەسكەندىر حاسانعالييەۆ، بيبىگۇل تولەگەنوۆا، روزا رىمبايەۆا جۇرتقا باسۋ ايتىپ، بيلىك پارتياسىنا داۋىس بەرۋدى ايتۋدى عانا بىلەدى.

ال ەلىمىزدەگى راديولار 20 جىلدان اسا ورىس پەن باتىستىڭ مادەنيەتىن ناسيحاتتاعاندا ولاردىڭ ەشقايسىسى «بۇلارىڭ قالاي؟» دەپ باس كوتەرگەن جوق. ەگەر ولار وزدەرىن قازاق مادەنيەتىنىڭ جاناشىرى ساناسا، نەگە ءورىستىلدى راديولارمەن  كۇرەسپەيدى؟

كەڭەس داۋىرىندە ورىستارعا جالتاقتاپ قالعان ونەر ادامدارى قازاق ءتىلى ءۇشىن كۇرەسپەيتىنىنە تولىقتاي كوزىمىز جەتتى. قايتا ولاردان گورى ۇلتتىق ماسەلەگە كەلگەندە تاباندىلىق تانىتىپ جۇرگەن ساكەن مايعازييەۆ، بەكجان تۇرىس، قالدىبەك ءقۇرمانالى سىندى ازاماتتارعا عانا سەنىم ارتۋعا بولاتىنداي.

سوندىقتان ساكەن مايعازييەۆ باستاعان قازاق انشىلەرى ەلىمىزدەگى راديولاردىڭ قازاق تىلىندە حابار تاراتىپ، ءان بەرۋىن باتىل تۇردە تالاپ ەتەتىن كەز جەتتى.
ەلىمىز تاۋەلسىزدىك العالى بەرى ۇزدىكسىز حابار تاراتىپ كەلە جاتقان «رەترو FM» راديوسى تەك قانا وزگە ەلدىڭ ەسكى اندەرىن قويادى. قازاقستانعا كەلگەن شەتەلدىك ازامات كۇندىز «رەترو FM» راديوسىن تىڭداسا، قازاقتا بۇعان دەيىن ءان بولماعان با دەپ ويلاپ قالۋى مۇمكىن.

ءوز باسىم اتالعان راديودا ءشامشى اندەرىن ەفيرلەرىنەن بەرگەنىن ەستىگەن ەمەسپىن. ەل ۇيقىعا كەتكەندە قازاق تىلىندەگى اندەردى بەرەتىنىن بىلەمىز. ال جۇرت تىڭدايتىن ۋاقىتتاردا  اتالامىش راديو قازاق اندەرىن مۇلدە ەفيرگە جىبەرمەيدى.
سوندا ءشامشىنىڭ كوڭىل شالقىتقان اندەرىن تىڭداۋ ءۇشىن ساعات ءتىلىنىڭ تۇنگى 12 اسقانىن كۇتىپ وتىرۋىمىز كەرەك پە؟ ەندى مۇنداي كوزبوياۋشىلىققا  توزۋگە بولمايدى. ويتكەنى، بيىل ەل تاۋەلسىزدىگىنە 25 جىل. مۇنى ولارعا ايتۋ كەرەك. ۇياتتارى بار شىعار.

ءدال وسى ماسەلەمەن ءشامشى مۇراسىن ناسيحاتتاپ جۇرگەن قالدىبەك ءقۇرمانالى كوتەرۋى كەرەك. ەگەر جوعارىدا قازاق ونەرىنە جانى اۋىراتىن ازاماتتار بولسا قالدىبەك ءقۇرمانالىنى «رەترو FM» ديرەكتورلىعىنا ۇسىنۋ كەرەك. قالدىەكەڭ ءبىر-اق كۇندە ەسكى اندەردى بەرەتىن راديوداعى ديدجەيلەردىڭ ءتىلىن قازاقشاعا كەلتىرىپ، «رەترو FM» راديوسىن قازاقتىڭ مول مۇراسىن ناسيحاتتايتىن اقپارات قۇرالىنا اينالدىراتىنىنا سەنىمدىمىن.

ارينە، ءبىز ايتتى ەكەن دەپ «رەترو FM» راديوسىنىڭ تىزگىنىن قالدىبەك قۇرمانالىگە تاپسىرا سالماسى انىق. سوندىقتان بۇل باعىتتا قالدىبەك ءقۇرمانالى، ساكەن مايعازييەۆ سىندى ونەر جاناشىرلارى وزدەرى كۇرەس جۇرگىزۋى كەرەك. ەگەر ولار بۇل باعىتتا باتىل تالاپ قوياتىن بولسا، ءقازاقتىلدى اۋديتوريا ولاردى تولىقتاي قولدايتىنىنا سەنىمدىمىن.

جالپى، بۇل ماسەلەنى كەز كەلگەن جۋرناليست كوتەرىپ، جازۋىنا بولادى. ءبىراق ولار شوۋ-بيزنەستىڭ توڭىرەگىندە جۇرگەن ازاماتتارداي تانىمال ەمەس. سوندىقتان قازاق انشىلەرى ورىس پەن باتىستىڭ مادەنيەتىن ناسيحتتاپ جۇرگەن راديولارمەن كۇرەسۋى كەرەك. بۇل رەتتە ساكەن مەن قالدىبەك اعامىزدى بەكەر اۋىزعا الىپ وتىرعان جوقپىز. ساكەن بۇعان دەيىن قازاق ءتىلى ءۇشىن كۇرەسىپ، ويىن اشىق ايتىپ، جۇرتقا ۇلتجاناشىرى رەتىندە تانىلدى. ال سازگەر، جۋرناليست قالدىبەك ءقۇرمانالى بۇگىندە ءبىر راديونى ەمەس، بىرنەشە راديونى باسقاراتىنداي تاجىريبە جيناعان ازامات. ەگەر قالدىەكەڭ قايسار مىنەزىنە سالسا، ءورىستىلدى راديولاردى تەزگە سالاتىن كۇش-قۋاتى بار.

نۇرلان اۋباكىر

ۇسىنىلعان
سوڭعى جاڭالىقتار