Qazaqstan Reseiden importtalatyn avtokólikterge ýtilalym mólsherin arttyrýdy josparlap otyr, dep habarlaidy Dala News.
Ónerkásip jáne qurylys ministri Ersaiyn Naǵaspaevtyń aitýynsha, bul sheshim Resei tarapy engizgen sharalarǵa jaýap retinde qabyldanbaq. Ministrdiń sózinshe, kórshi el qazaqstandyq kólikter úshin ýtilalymdy birneshe ese, tipti ondaǵan ese arttyrǵan.
«Buiryq áli qol qoiylǵan joq. Biz Resei naryǵyna qatysty jańa talap engizip otyrǵan joqpyz, tek qalyptasqan jaǵdaidy aina-qatesiz qaitalap otyrmyz. Eki eldiń naryǵyna da teń qoljetimdilik bolýy kerek. Reseide bizdiń kólikter úshin ýtilalym birneshe ese, ondaǵan ese kóterildi. Sonymen qatar ol jaqta 2029–2030 jyldarǵa deiin jyl saiyn ósetin progressivti shkala engizilgen. Sonyń saldarynan ýtilalym mólsheri óte joǵary deńgeige jetedi», – dedi ministr úkimettegi brifingte.
Ministrdiń aitýynsha, bul qadam otandyq avtokólik óndirisin damytýǵa baǵyttalǵan. Onyń pikirinshe, reseilik kólikterdiń qymbattaýy Qazaqstan naryǵyna aitarlyqtai áser etpeidi.
«Bizde naqty statistika bar. Reseiden Qazaqstanǵa keletin kólikter sany kóp emes. Sondyqtan baǵanyń kúrt ósýi bolmaidy. Bul – naryqtyq mehanizm. Resei importy shamamen 3,7% ǵana, sondyqtan munda úlken qaýip kórip turǵan joqpyn», – dedi Ersaiyn Naǵaspaev.
