Jýyrda Senatta ótken brifingte Sherzat Bolattyń isine qatysty jańa derekter jariia boldy. Bas prokýrordyń orynbasary Ǵalymjan Qoigeldiev Sherzat Bolattyń úii órtenýine qatysty isti tergeý barysyn bólisti. Osylaisha keibir saýaldar Reseige jiberilgeni belgili boldy.
Bul qandai saraptama? Nelikten Reseige jiberildi? Osy suraqtarǵa Májilis depýtaty ári zańger Abzal Quspan jaýap berdi, dep habarlaidy Dalanews.kz.
Sherzattyń otbasynyń advokaty Meiirman Shekeev depýtat Abzal Quspanǵa osy baǵytta birer saýal qoiǵan. Bul týraly advokat áleýmettik jelide jariialady.
"Bul aqparatty rastaimyn. Reseide Qazaqstanda joq saraptama taǵaiyndalyp otyr. Spýtnik arqyly úi órtengen kezde qandai kólik keldi, buǵan deiin, odan keiin bóten adamdar boldy ma, bolmady ma (osy nárseler anyqtalady - esk.)", - dedi Abzal Quspan.
Advokat depýtattan Sherzattyń aǵasy Nurǵanattyń ólimine qatysty da Reseide osyndai saraptama júrgizý múmkindigi bar-joǵyn surady. Depýtat quzyrly organdar ádildik ornatýda budan tartynbaý kerek deidi.
"Meniń oiymsha, qorǵaý tarapynan tiisti ótinish hat berilgen jaǵdaida ábden múmkin. Kez kelgen qylmystyq isti tergeýdegi basty másele - shyndyqqa kóz jetkizý, ádilettilikti qalpyna keltirý. Bul joly da qandai saraptama bolsa da, qansha aqsha tursa da tiisti organdar budan tartynyp qalmaýy kerek dep oilaimyn", - dedi depýtat.
Aita keteiik, buǵan deiin Bas prokýratýra ókili bul tekseriske ýaqyt kerek ekenin málimdegen edi.
Sherzat Bolattyń ólimi týraly ne belgili?
Eske salaiyq, byltyr Talǵarda jappai tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boiynsha Almaty oblysynyń Politsiia departamenti qylmystyq is qozǵady. Sondai-aq, olardyń úii órtenip ketti.
Kóp uzamai, iaǵni 9 jeltoqsanda marqum Sherzat Bolattyń aǵasy Nurǵanat Ǵaiypbaev ajal qushty. Politsiia departamenti aldyn ala derekter boiynsha ol sýitsid jasaǵanyn málimdedi. Oǵan dálel retinde politseiler Nurǵanattyń týysyna messendjer arqyly jazǵan hatyn jariia etti.
Al marqum Sherzattyń ákesi baýyry Nurǵanat Ǵaiypbaevty jer qoinyna tapsyrǵanan keiin buqaralyq aqparat quraldarymen kezdesýdi talap etip, kóshege shyqty. Alaida araǵa uzaq ýaqyt salmai Qarjaýbai Nurymovty politsiia qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keiin Qarjaýbai Nurymov 15 táýlikke ákimshilik qamaýǵa alyndy.
