Jeti qazaqstandyq Reseidiń Samara qalasy mańynda jol apatyna tústi. Olar Oral aýrýhanalaryna jetkizildi, dep habarlaidy Dalanews.kz.
Densaýlyq saqtaý ministrliginiń málimetinshe, «Samara – Bolshaia Chernigovka» tas jolynda (RF Samara oblysy) avtomobil apatynan zardap shekken Qazaqstannyń alty azamaty, onyń ishinde eki bala búginde 6 birlik sanitariialyq avtokóliktiń kómegimen Oral meditsinalyq mekemelerine tasymaldandy. Taǵy bir zardap shekken qazaqstandyqty TJ departamentiniń brigadasy jetkizdi.
Resei aýmaǵynda qazaqstandyq azamattar jol apatyna túskennen keiin oqiǵa ornyna shuǵyl túrde alty jedel járdem brigadasy jolǵa shyqty.
Zaqymdar men jaraqattardyń aýyrlyǵyn eskere otyryp, shuǵyl meditsinalyq kómek kórsetý úshin brigadalardyń quramynda balalar men eresekter travmatologtary, hirýrgtar, neirohirýrg, reanimatolog, 6 feldsher boldy.
Apattan zardap shekkenderde midyń shaiqalýy, aiaq-qoldardyń, jambas súiekteriniń, omyrtqanyń synýy, kógerý, gematoma jáne ortasha aýyrlyq dárejesindegi kóptegen jaraqattar tirkeldi.
Búgin tańerteń erte zardap shekken 5 eresek adam Oral qalalyq kópbeiindi aýrýhanasyna, 2 bala oblystyq kópbeiindi balalar aýrýhanasyna emdeýge jatqyzyldy, onda olarǵa meditsinalyq kómektiń tolyq kólemi kórsetiledi.
Brigadalardyń tasymaldaýy barysynda patsientterdiń jai-kúiiniń nasharlaýyna jol berilgen joq.
