Reseide 50 myńǵa jýyq paidalanylǵan kólik satylymǵa shyǵaryldy. Kórshi elde jańa jyldan bastap shart talaptaryn buzǵany úshin ielerinen tárkilengen, buryn lizingte bolǵan kólikter 5–40% jeńildikpen satylmaq, dep habarlaidy Dalanews.kz 31 arnaǵa silteme jasap.
Degenmen sarapshylar bul kólikterdiń aýqymdy kólemde Qazaqstanǵa aǵylýy ekitalai dep sanaidy. Aitýlarynsha, qoldanysta bolǵan kólikterdiń jalpy sanynyń 20 paiyzynan aspaityn bóligi ǵana Qazaqstanǵa kelýi múmkin.
"Mysaly, avtokólik bazarda 10 mln teńge turady delik. Eger olar ony 40% jeńildikpen usynsa, árine, satyp alýshy baryp, sol kólikti alady. Biraq ol qosymsha QQS tóleidi. QQS kólemi de ósedi. Munda bári baǵanyń qanshalyqty qoljetimdi bolýyna bailanysty. Biraq bul asa tiimdi bolady dep oilamaimyn, óitkeni lizing berýshiler kólikterdi ózderine ziian keltiretindei tym tómen baǵamen satpaidy", - deidi "Jalpy jol" jol qaýipsizdigi qaýymdastyǵynyń prezidenti Arsen Shakýov.
Sarapshylardyń boljamynsha, kólikterdiń negizgi bóligin reseilik tutynýshylardyń ózi satyp alady. Óitkeni Resei ishinde olar qosymsha QQS pen baj salyǵynsyz aitarlyqtai arzanyraq bolady.
Sonymen birge 2026 jyly Reseidegi taksoparkter otandyq qurastyrýdaǵy avtokólikterge kóshýi tiis. Bul naryqqa shamamen 800 myń paidalanylǵan sheteldik kóliktiń shyǵýyna ákelýi múmkin. Olardyń bir bóligin taksi júrgizýshileriniń ózderi satyp alsa, negizgi bóligi avt defitsitin sezinip otyrǵan Reseidiń ishki naryǵynda qalady.
"Bul kólikterdi Reseidiń ishki naryǵy ońai sińiredi jáne oǵan qýanady dep oilaimyn. Sebebi takside, ádette, eski kólikter júrmeidi — eki-úsh jyl qoldanylǵan modelder ǵana bar. Bul Resei naryǵy úshin óte tartymdy usynys. Sondyqtan olardyń nege Qazaqstanǵa aǵylýy kerek? Bizde kólik tapshylyǵy joq. Kerisinshe, jańa zaýyttar salynyp jatyr", - deidi avtosarapshy Aleksei Alekseev.
Degenmen bul kólikterdiń az bóligi Qazaqstan naryǵynda da paida bolýy múmkin. Alaida Qazaqstanǵa kólik ákelý áli de qymbat — ýtilalym men kedendik tólemder bar. Sol sebepti sarapshylardyń pikirinshe, bizge jappai partiialardan góri jekelegen tapsyrystar, sirek úlgiler nemese otandyq naryqta joq qozǵaltqyshy bar modelder jii jetkiziledi.
