Resei Ýkrainadaǵy soǵysta qoldanatyn raketalardy Qazaqstanda synaqtan ótkizip júr. Bul týraly "Novaia Gazeta" basylymy kólemdi material jazǵan. Materialda reseilikter Qazaqstannyń batysyndaǵy Bókeiorda dalasyn qarý-jaraqty synaý úshin qoldanyp júrgeni aitylady, - dep habarlaidy Dalanews.kz.
Basylym málimetinshe,"Kapýstin Iar" zymyran poligony Reseidiń Astrahan oblysynda ornalasqan. Biraq bul jerde synalatyn zenittik jáne ballistikalyq zymyrandar Qazaqstan jaqqa ushyp,erekshe qorǵalatyn tabiǵi qoryq - Bókeiorda dalasyna túsetin kórinedi.
"Bul jerde raketaniń qaldyqtary áli kúnge deiin shashylyp jatady. Reseilik áskeriler aimaqty qorshaýǵa alyp, raketanyń qaldyqtaryn jinap alýy kerek. Biraq ádette ony da ózimiz tazalaimyz. Olardyń raketasy áli jarylǵan joq jáne olar kelip, raketany ózderi jerge kómip jatqanyn kórgenbiz", - deidi gid jýrnaliske.
Gidtiń sózinshe, úiler men raketa synalatyn jerdiń arasy shamamen eki shaqyrym. Raketa aýyldy mekenderge, tipti bireýdiń qorasyna túsip ketken kezder bolǵan kórinedi.
"Úige raketa túskeni esimde joq, biraq synaqtardyń zalaly qandai bolǵanyn jáne zardap shekkender bar-joǵyn bilmeimiz. Sebebi óz tarapymyzdan bul nárseni baqylaýǵa ala almaimyz. Qazaqstan biligi bul jaǵdaidy jasyryn ustaǵysy keledi".
Gidtiń sózinshe, synalyp júrgen raketalardyń jergilikti tórt túlikke de saldary tiip jatyr. Sebebi iri-qara maldar reseilik zymyrandardan qalǵan aryqtarda jinalǵan sýdy ishedi eken. Odan bólek, bul aimaqta eresekter arasynda qaterli isikke shaldyǵatyndar kóp bolsa, balalar arasynda múmkindigi shekteýli bolyp týatyndar kóp. Bul da qarýdy synaqqa alýdyń saldarynan bolýy múmkin.
Basylym málimetinshe, byltyr sáýirde Resei Qazaqstannyń Sary-Shaǵan poligonynda qurlyqaralyq ballistikalyq zymyrandy ushyrǵan.
Iadrolyq qarýǵa tyiym salýdy baqylaý jónindegi baqylaý uiymy Qazaqstannyń qarý synaqtaryn júrgizýde sáikessizdikter baryn anyqtaǵan. Uiym málimetinshe, mundai zymyrandyq synaqtar Iadrolyq qarýǵa tyiym salýdy baqylaý jónindegi baqylaý uiymnyń rýhyna sáikes kelmeidi.
Qazaqstan da synaqtarǵa qatysty aitylǵan málimdemelerge jaýap berip, synalǵan qurlyqaralyq ballistikalyq zymyrandardyń eshqaisysynda iadrolyq paidaly júkteme bolmaǵanyn atap ótti.
"Negizi orystar Qazaqstandy qarýdy synaý úshin buǵan deiin de paidalanyp ta júrgen. Ýkrainada soǵys bastalǵan kezde ǵana jergilikti turǵyndar zymyran qaldyqtarynyń saldaryna mán bere bastaǵan. Buǵan deiin bolǵan nárselerge mán berilmegen de", - delingen materialda.
Aita keteiik, 28 aqpanda zymyran synaqtaryna qatysty Qazaqstannyń Qorǵanys ministrligi jaýap bergen bolatyn. Qorǵanys Vitse-ministri Shaih-Hasan Jazyqbaevtyń aitýynsha, áńgime Resei áskerileri 200 shaqyrymdyq zymyrandardy synaqtan ótkizetin Sary-Shaǵan poligony týraly bolyp otyr. Testileýdiń ruqsat etilgen eń uzaq ýaqyty - jylyna 50 saǵat.
Alaida vitse-ministr zymyran synalatyn jerde eshqandai infraqurylym, jergilikti turǵyndar joǵyn alǵa tartty. Onyń sózinshe, qarý synalatyn jerde 900 reseilik áskeri júr.
