رەسەي ۋكرايناداعى سوعىستا قولداناتىن راكەتالاردى قازاقستاندا سىناقتان وتكىزىپ ءجۇر. بۇل تۋرالى "نوۆايا گازەتا" باسىلىمى كولەمدى ماتەريال جازعان. ماتەريالدا رەسەيلىكتەر قازاقستاننىڭ باتىسىنداعى بوكەيوردا دالاسىن قارۋ-جاراقتى سىناۋ ءۇشىن قولدانىپ جۇرگەنى ايتىلادى، - دەپ حابارلايدى Dalanews.kz.
باسىلىم مالىمەتىنشە،"كاپۋستين يار" زىمىران پوليگونى رەسەيدىڭ استراحان وبلىسىندا ورنالاسقان. ءبىراق بۇل جەردە سىنالاتىن زەنيتتىك جانە بالليستيكالىق زىمىراندار قازاقستان جاققا ۇشىپ،ەرەكشە قورعالاتىن تابيعي قورىق - بوكەيوردا دالاسىنا تۇسەتىن كورىنەدى.
"بۇل جەردە راكەتانىڭ قالدىقتارى ءالى كۇنگە دەيىن شاشىلىپ جاتادى. رەسەيلىك اسكەريلەر ايماقتى قورشاۋعا الىپ، راكەتانىڭ قالدىقتارىن جيناپ الۋى كەرەك. ءبىراق ادەتتە ونى دا ءوزىمىز تازالايمىز. ولاردىڭ راكەتاسى ءالى جارىلعان جوق جانە ولار كەلىپ، راكەتانى وزدەرى جەرگە كومىپ جاتقانىن كورگەنبىز"، - دەيدى گيد جۋرناليسكە.
گيدتىڭ سوزىنشە، ۇيلەر مەن راكەتا سىنالاتىن جەردىڭ اراسى شامامەن ەكى شاقىرىم. راكەتا اۋىلدى مەكەندەرگە، ءتىپتى بىرەۋدىڭ قوراسىنا ءتۇسىپ كەتكەن كەزدەر بولعان كورىنەدى.
"ۇيگە راكەتا تۇسكەنى ەسىمدە جوق، ءبىراق سىناقتاردىڭ زالالى قانداي بولعانىن جانە زارداپ شەككەندەر بار-جوعىن بىلمەيمىز. سەبەبى ءوز تاراپىمىزدان بۇل نارسەنى باقىلاۋعا الا المايمىز. قازاقستان بيلىگى بۇل جاعدايدى جاسىرىن ۇستاعىسى كەلەدى".
گيدتىڭ سوزىنشە، سىنالىپ جۇرگەن راكەتالاردىڭ جەرگىلىكتى ءتورت تۇلىككە دە سالدارى ءتيىپ جاتىر. سەبەبى ءىرى-قارا مالدار رەسەيلىك زىمىرانداردان قالعان ارىقتاردا جينالعان سۋدى ىشەدى ەكەن. ودان بولەك، بۇل ايماقتا ەرەسەكتەر اراسىندا قاتەرلى ىسىككە شالدىعاتىندار كوپ بولسا، بالالار اراسىندا مۇمكىندىگى شەكتەۋلى بولىپ تۋاتىندار كوپ. بۇل دا قارۋدى سىناققا الۋدىڭ سالدارىنان بولۋى مۇمكىن.
باسىلىم مالىمەتىنشە، بىلتىر ساۋىردە رەسەي قازاقستاننىڭ سارى-شاعان پوليگونىندا قۇرلىقارالىق بالليستيكالىق زىمىراندى ۇشىرعان.
يادرولىق قارۋعا تىيىم سالۋدى باقىلاۋ جونىندەگى باقىلاۋ ۇيىمى قازاقستاننىڭ قارۋ سىناقتارىن جۇرگىزۋدە سايكەسسىزدىكتەر بارىن انىقتاعان. ۇيىم مالىمەتىنشە، مۇنداي زىمىراندىق سىناقتار يادرولىق قارۋعا تىيىم سالۋدى باقىلاۋ جونىندەگى باقىلاۋ ۇيىمنىڭ رۋحىنا سايكەس كەلمەيدى.
قازاقستان دا سىناقتارعا قاتىستى ايتىلعان مالىمدەمەلەرگە جاۋاپ بەرىپ، سىنالعان قۇرلىقارالىق بالليستيكالىق زىمىرانداردىڭ ەشقايسىسىندا يادرولىق پايدالى جۇكتەمە بولماعانىن اتاپ ءوتتى.
"نەگىزى ورىستار قازاقستاندى قارۋدى سىناۋ ءۇشىن بۇعان دەيىن دە پايدالانىپ تا جۇرگەن. ۋكراينادا سوعىس باستالعان كەزدە عانا جەرگىلىكتى تۇرعىندار زىمىران قالدىقتارىنىڭ سالدارىنا ءمان بەرە باستاعان. بۇعان دەيىن بولعان نارسەلەرگە ءمان بەرىلمەگەن دە"، - دەلىنگەن ماتەريالدا.
ايتا كەتەيىك، 28 اقپاندا زىمىران سىناقتارىنا قاتىستى قازاقستاننىڭ قورعانىس مينيسترلىگى جاۋاپ بەرگەن بولاتىن. قورعانىس ۆيسە-مينيسترى شايح-حاسان جازىقبايەۆتىڭ ايتۋىنشا، اڭگىمە رەسەي اسكەريلەرى 200 شاقىرىمدىق زىمىرانداردى سىناقتان وتكىزەتىن سارى-شاعان پوليگونى تۋرالى بولىپ وتىر. تەستىلەۋدىڭ رۇقسات ەتىلگەن ەڭ ۇزاق ۋاقىتى - جىلىنا 50 ساعات.
الايدا ۆيسە-مينيستر زىمىران سىنالاتىن جەردە ەشقانداي ينفراقۇرىلىم، جەرگىلىكتى تۇرعىندار جوعىن العا تارتتى. ونىڭ سوزىنشە، قارۋ سىنالاتىن جەردە 900 رەسەيلىك اسكەري ءجۇر.
