Energetika ministri Erlan Aqkenjenov Qazaqstanda salynýy josparlanǵan úsh jylý elektr ortalyǵy (JEO) jobasynyń qazirgi jai-kúiine toqtalyp, olardyń ekeýi boiynsha Resei tarapynan ázirge jaýap joq ekenin málimdedi, dep habarlaidy Dalanews.kz.
Ministrdiń aitýynsha, Kókshetaýdaǵy JEO-ny salý jobasyn Qazaqstan óz kúshimen iske asyrýdy sheshken. Bul týraly úkimet premer-ministrdiń jumys sapary barysynda Resei Federatsiiasyn resmi túrde habardar etken.
"Jazda úkimet Kókshetaýdaǵy JEO-ny ózimiz júzege asyramyz degen sheshim qabyldady. Jumystar bastalyp ketti: kúzde jer qazý jumystary júrgizildi, alańdy daiyndaý jarty jyldan beri júrip jatyr. Tapsyrys berýshi - Energetika ministrligi, joba «Samuryq-Energo» kompaniiasyna berildi, barlyq jumysty osy kompaniia atqarady", - dedi Erlan Aqkenjenov.
Al qalǵan eki JEO-nyń qurylysyna qatysty jaǵdai ázirge belgisiz kúide qalyp otyr.
"Qazirgi tańda Resei Federatsiiasy tarapynan jeńildetilgen qarjylandyrý boiynsha naqty jaýap alǵan joqpyz. Qazaqstan tarapy bul máseleni qolaily sátterde kóterip keledi, alaida memleketaralyq jeńildetilgen nesie boiynsha sheshim áli qabyldanǵan joq", - dep atap ótti ministr.
Onyń aitýynsha, eger aldaǵy ýaqytta bul másele sheshilmese, Qazaqstan atalǵan jobalardy da óz resýrstary esebinen júzege asyrýǵa májbúr bolady.
2025 jyldyń mamyr aiynda Qazaqstanda JEO qurylysyna qatysty ózge investor paida bolýy múmkin ekeni habarlanǵan. Áńgime Abai, Aqmola jáne Shyǵys Qazaqstan oblystaryndaǵy jobalar týraly bolǵan.
