Qazaqstan Syrtqy ister ministriniń birinshi orynbasary Erjan Ashyqbaev Reseide qazaqstandyqtar qatysqan jappai tóbeleske qatysty túsinikteme berdi, dep habarlaidy Dalanews.kz.
Onyń aitýynsha, Qazaqstan konsýly oqiǵaǵa qatysy bar azamattarǵa qajetti kómek kórsetip jatyr. Qaqtyǵysqa bailanysty birneshe adam ustalǵanymen, olardyń basym bóligi keiin bosatylǵan. Qazirgi ýaqytta birqatar azamat ákimshilik qamaýda otyr, al úsh qazaqstandyqqa qatysty tergeý amaldary jalǵasyp jatyr.
Erjan Ashyqbaevtyń sózinshe, janjal turmystyq sipatta bolǵan. Búginde jaǵdai turaqty, qosymsha qaqtyǵystar tirkelmegen.
"Qazirgi tańda olarǵa eshqandai qaýip tónip turǵan joq", – dedi ol Májilis kýlýarynda.
Sondai-aq vitse-ministr kásiporynda jumys istep júrgen qazaqstandyqtardy elge qaitarýdyń qajeti joq ekenin atap ótti. Onyń málimetinshe, atalǵan portta shamamen 4 myńǵa jýyq otandasymyz eńbek etýde.
Aita keteiik, buǵan deiin Ýst-Lýgadaǵy vahtalyq qalashyqta jumysshylar men kúzet qyzmetkerleri arasynda janjal týyndaǵany týraly jazǵan edik. Bul nysanda túrli elden kelgen jumysshylar eńbek etedi, onyń ishinde Qazaqstan azamattary da bar.
Áleýmettik jelide taraǵan videolarda birneshe adamnyń jinalyp, qaqtyǵys bolǵany kórinedi. Keibir kadrlarda avtokóliktiń adamdar tobyna qarai júrgeni, al basqa videolarda kúzet qyzmetkerleriniń adamdardy kúshtep kólikke otyrǵyzǵany baiqalady.
Alaida resmi derekkózder bul oqiǵany ultaralyq qaqtyǵys emes, jumysshylar men kúzet arasyndaǵy turmystyq janjal dep sipattady.
Qansha adam ustaldy?
Reseilik quqyq qorǵaý organdarynyń málimetinshe, janjaldan keiin politsiiaǵa 30-dan astam adam jetkizilgen. Olardyń bir bóligi ákimshilik jaýapkershilikke tartylyp, keiin bosatylǵan.
Qazaqstan Syrtqy ister ministrligi de bul aqparatty rastady. Vedomstvonyń málimetinshe, ustalǵandardyń arasynda Qazaqstan azamattary bar. Keibirine 10 táýlikke deiin ákimshilik qamaý taǵaiyndalǵan.
Sonymen qatar úsh qazaqstandyqqa qatysty tergeý áreketteri jalǵasyp jatyr.
Zardap shekkender bar ma?
Resmi aqparatqa sáikes, Qazaqstan azamattarynyń arasynda aýyr jaraqat alǵandar joq.
Qazaqstan SIM ókilderi jaǵdaidy baqylaýda ustap otyrǵanyn málimdedi. Sankt-Peterbýrgtegi Bas konsýldyq qyzmetkerleri oqiǵa ornyna baryp, ustalǵan azamattarmen kezdesken.
