Qyrǵyzstannyń "Keremet banki" Resei Federatsiiasynyń sheneýnikterimen bailanysty jáne sanktsiiadaǵy "Promsviazbankti" qoldady degen aiypqa ushyrady. Onda da sońǵysyna qatysty reseilik banktiń sanktsiiany ainalyp ótýine qolǵabys etýde transshekaralyq aýdarymdardy júrgizýge at salysqany aitylady. Al óz kezeginde "Keremet bank" AQSh-tyń ózderine salǵan sanktsiiasyna qarsy shaǵym bildirmek niette, dep jazady Dalanews.kz.
"Keremet bank AQSh Qarjy ministrliginiń Sheteldik aktivterdi baqylaý keńsesiniń sheshimine qarsy shaǵym túsiretin bolady. Bizdiń bank árdaiym elimizdiń jáne halyqaralyq zańnamalar sheńberinde jumys istep, óz mindettemelerin ashyq ári qaltqysyz oryndap keledi" , delingen qarjy uiymynyń saitynda.
Bank búginderi barlyq bólimsheler qalypty rejimde jumys istep jatqanyn naqtylap, atalǵan jaǵdai bankke keri áser etpegenin aitady.
Al amerikalyq vedomstvonyń málimetinshe, 2024 jyldyń jazynan bastap "Keremet bank" reseilik sheneýnikterge jáne "Promsviazbankke" (PSB) sanktsiialardan jaltarýǵa, atap aitqanda transshekaralyq aýdarymdarǵa kómektesken.
PSB Ýkrainadaǵy soǵys bastalǵan kezde-aq AQSh Qarjy ministrliginiń qara tizimine engen. Osydan birneshe jyl buryn Resei biligi qorǵanys ónerkásibin qarjylandyrý jáne iri kelisimsharttarǵa qyzmet etý úshin atalǵan bankke ulttyq mártebe bergen edi.
Sondai-aq 2024 jyly Qyrǵyzstannyń Qarjy ministrligi "Keremet bank" aktsiialarynyń baqylaý paketin Resei úkimetimen bailanysy bar reseilik oligarhpen tyǵyz bailanysty firmaǵa satqany aitylady.
"Keremet bankti" satyp alý Resei úshin import aqysyn tóleý jáne eksporttan túsetin aqshany ielenýde sanktsiialardan jaltarý habyn qurýǵa baǵyttalǵan", delinedi amerikalyq vedomstvo málimdesinde.
Buǵan deiin saitymyzda "Eshqai port qabyldamaidy. Resei munaiyn tiegen tankerler teńiz betinde "tentirep" júr" degen maqala jariialanǵan. Onda búginderi álemniń túkpir-túkpirinde teńiz betinde qalqyp, áreketsiz qalǵan munai tasýshy reseilik tankerler sany 65-ten asqany aitylady. Ótken jumada, 10 qańtarda AQSh Reseidiń munai sektoryna qarsy sanktsiialar salǵannan keiin osyndai kúrdeli máseleler týyndaǵan.
