Resei Federatsiiasy Qazaqstannan jetkizilgen iri kólemdegi azyq-túlik ónimderin shekarada ótkizbei, keri qaitardy, dep habarlaidy Dala News.
Reseidiń veterinarlyq jáne fitosanitarlyq baqylaý qyzmetiniń Ýral óńiraralyq basqarmasynyń málimetinshe, 2026 jylǵy 13-19 sáýir aralyǵynda Cheliabi oblysyndaǵy Qazaqstanmen shekaralas «Býgristoe» jáne «Nikolaevka» avtomobildik ótkizý beketterinde táýlik boiy baqylaý júrgizilgen.
Tekserý nátijesinde Qazaqstannan Reseige baǵyttalǵan janýar tektes ónimderdiń iri partiiasy talaptarǵa sáikes kelmeitini anyqtalǵan. Atap aitqanda, 12 júk kóligimen tasymaldanǵan jalpy salmaǵy 279,3 tonna bolatyn balmuzdaq pen iogýrt turaqtandyrǵyshy el aýmaǵyna kirgizilmegen.
Inspektorlardyń aitýynsha, negizgi sebep – veterinarlyq ilespe qujattardaǵy olqylyqtar. Qujattarda ónimniń naqty qai óndiris ornynan shyqqany kórsetilmegen. Bul ónimniń tolyq qadaǵalanýyn, iaǵni onyń shyǵý tegi men qaýipsizdigin baqylaýdy múmkin emes etedi. Osyǵan bailanysty júk Resei aýmaǵyna jiberilmei, keri qaitarylǵan.
Sonymen qatar sol kezeńde Ózbekstannan jetkizilgen 1 728 ara paketi de Reseige kirgizilmegen. Bul jaǵdaida da veterinarlyq qujattar talaptarǵa sai bolmaǵany anyqtalǵan.
Budan bólek, keri baǵyttaǵy tasymaldaýda da zańbuzýshylyqtar tirkelgen. Reseiden Qazaqstanǵa jóneltilgen 2,5 tonna muzdatylǵan teńiz balyǵy shekarada toqtatylǵan. Tekserý barysynda bul ónimdi jóneltken kásiporyndardyń Eýraziialyq ekonomikalyq odaqtyń tiisti reestrine engizilmegeni belgili bolǵan. Iaǵni, olar mundai ónimdi eksporttaýǵa quqyǵy joq bolyp shyqqan. Osyǵan bailanysty júk zań talaptaryna sáikes keri qaitarylǵan.
Resei tarapy mundai sharalar ónim qaýipsizdigin qamtamasyz etý jáne veterinarlyq talaptardyń saqtalýyn baqylaý maqsatynda qabyldanatynyn atap ótti.
Aita keteiik, Eýraziialyq ekonomikalyq odaq aiasynda azyq-túlik ónimderin tasymaldaý kezinde ónimniń shyǵý tegi, qaýipsizdigi jáne óndirýshi kásiporyn týraly tolyq ári naqty aqparattyń bolýy mindetti talap bolyp sanalady. Qujattaǵy kez kelgen sáikessizdik ónimniń shekaradan ótpeýine negiz bola alady.
