30 shildege qaraǵan túni Resei Ýkraina aýmaǵyna zymyrandar men ushqyshsyz ushý apparattarymen jappai shabýyl jasap, saldarynan keminde segiz adam, onyń ishinde eki bala qaza tapty. Taǵy ondaǵan turǵyn túrli deńgeide jaraqat alǵan. Bul týraly Ýkraina biligi málimdedi, dep habarlaidy dalanews.kz.
Dnepropetrov oblysyndaǵy Krivoi Rog mańyndaǵy Radýshnoe aýylynda ballistikalyq zymyran kópbalaly otbasy turǵan jeke turǵyn úige túsken. Saldarynan alty adam, onyń ishinde 5 jáne 12 jastaǵy eki qyz kóz jumdy. Taǵy segiz adam jaraqat alǵan.
Kievte shabýyldan bir adam qaza taýyp, eki turǵyn jaralandy. Poltava oblysynda dron jeke kásiporynnyń qoimasyna tiip, bir adamnyń ómirin qidy. Al Lvov qalasynda turǵyn úilerge zaqym kelip, 30-dan astam adam jaralanǵan. Zardap shekkenderdiń arasynda balalar da bar.
Ýkraina áýe kúshteriniń málimetinshe, Resei bir túnde 74 zymyran men 280-den astam dron ushyrǵan. Al Resei Qorǵanys ministrligi soqqylar áskeri aerodromdarǵa, qorǵanys ónerkásibi kásiporyndaryna jáne áskeri logistika nysandaryna baǵyttalǵanyn málimdedi.
Shabýyl Ýkraina prezidenti Vladimir Zelenskiidiń Vashingtonda AQSh prezidenti Donald Tramppen kezdesip, Patriot áýe qorǵanys júiesine arnalǵan zymyrandardy Ýkrainada litsenziia boiynsha óndirýge ruqsat berý máselesin kótergennen keiin jasaldy.
