Astana áýejaiynda Reseidiń suraýy boiynsha ustalǵan Ýkraina azamaty Liýbov Rojanskaia qamaýdan bosatylyp, Qazaqstannan ketti. Resei biligi ony nemeresin Ýkrainaǵa qaitarý áreketine bailanysty qozǵalǵan qylmystyq is aiasynda ekstraditsiialaýdy talap etken, dep habarlaidy dalanews.kz.
Rojanskaia ýaqytsha ustaý izoliatorynda úsh táýlik bolǵan. Alaida sot ony qamaýǵa alý týraly sheshim shyǵarmaǵan. Bostandyqqa shyqqannan keiin áiel birneshe kún Ýkrainanyń Qazaqstandaǵy elshiliginde bolyp, keiin Eýropa elderiniń biri arqyly Odessaǵa attanǵan.
Onyń advokaty Aleksei Prianishnikov Resei tarapynyń ekstraditsiia týraly suraýy áli resmi túrde keri qaitarylmaǵanyn málimdedi. Áieldiń bosatylýyna Ýkrainanyń Syrtqy ister ministrligi men adam quqyqtary jónindegi ýákil Dmitrii Lýbinets aralasqan. Ýkraina elshiligi de Qazaqstan biliginen ony Reseige bermeýdi suraǵan.
Nemeresin alyp ketýge kelgen
Liýbov Rojanskaia Qazaqstanǵa nemeresin alyp ketý úshin kelgen. Bala Reseiden jetkizilip, ýkrainalyq týystaryna tabystalýǵa tiis bolǵan. Alaida Ystanbuldan Astanaǵa ushyp kelgen áiel áýejaida ustaldy.
2018 jyly týǵan bala ata-anasymen birge Odessada turǵan. Keiin olar ajyrasyp, balanyń anasy Resei azamatyna turmysqa shyqqan. 2021 jyly ol ulymen birge Kaliningrad oblysyna baryp, sonda qalyp qoiǵan. Soǵys bastalǵannan keiin anasy ózi jáne balasy úshin Resei azamattyǵyn alǵan.
Balanyń ákesi ulyn Ýkrainaǵa qaitarý úshin sotqa júgingen. 2025 jylǵy naýryzda Ýkrainanyń Joǵarǵy soty balanyń ákesimen birge Odessada turýy kerek degen sheshimdi kúshinde qaldyrǵan.
