Reseilik Wildberries marketpleisi Qazaqstanda shamamen 100 myń sharshy metr qoima izdep jatyr. Naryqtaǵy málimetke sáikes, mundai kólemdegi jalǵa alý aiyna 518 mln teńgege túsýi múmkin jáne eldegi bos qoima alańdarynyń shamamen 77%-yn qamtidy, dep habarlaidy dalanews.kz.
Bul týraly Reseidiń «Kommersant» basylymy jyljymaityn múlik naryǵyndaǵy tórt derekkózge silteme jasap habarlady. Basylymnyń málimetinshe, Reseidegi logistikalyq infraqurylym jumysynyń irkilisterine bailanysty Wildberries-ti damytatyn RWB toby reseilik satýshylardyń taýarlarynyń bir bóligin Qazaqstandaǵy qoimalarǵa ornalastyrý múmkindigin qarastyryp otyr.
Eger kompaniia 100 myń sharshy metrdi naryqtaǵy ortasha baǵamen jalǵa alsa, ai saiynǵy jaldaý quny shamamen 518 mln teńgeni, al jyldyq shyǵyn 6,2 mlrd teńgeni quraýy múmkin. Bul esepke kommýnaldyq tólemder, kúzet, qyzmet kórsetý jáne logistikalyq shyǵyndar kirmeidi.
Qazaqstanda bos qoima az
Sarapshylardyń aitýynsha, Qazaqstanda qazirgi tańda joǵary sapaly qoima nysandarynyń shamamen 130 myń sharshy metri ǵana bos. Onyń ózi birneshe qalaǵa bólinip ornalasqan. Elde birden 100 myń sharshy metrlik daiyn qoima kesheni joq.
Osyǵan bailanysty Wildberries-ke birneshe nysandy qatar jalǵa alýǵa nemese jańa qoimalar salý jóninde kelissóz júrgizýge týra kelýi yqtimal.
Mundai iri jalǵa alýshynyń paida bolýy qoima naryǵyndaǵy básekelestikti kúsheitip, basqa marketpleisterge, saýda jelilerine, distribiýtorlarǵa, óndirýshiler men kólik kompaniialaryna áser etýi múmkin.
Nelikten tańdaý Qazaqstanǵa tústi?
Qazaqstan men Reseidiń Eýraziialyq ekonomikalyq odaqtaǵy (EAEO) ortaq kedendik keńistigi taýarlardy eki el arasyndaǵy qoimalarda erkin ornalastyrýǵa múmkindik beredi. Osylaisha reseilik satýshylardyń ónimderi Qazaqstanda saqtalsa, qazaqstandyq kásipkerlerdiń taýarlary Reseidegi Wildberries qoimalarynda ornalastyryla alady.
Reuters agenttiginiń málimetinshe, Reseidegi shabýyldar Wildberries logistikalyq infraqurylymynyń shamamen 10%-yna, iaǵni 552 myń sharshy metr qoima alańyna áser etken. Osyǵan bailanysty kompaniia taýar qorlarynyń bir bóligin basqa elderge kóshirý arqyly táýekeldi azaitýdy kózdeýi múmkin.
Eger taýarlar Qazaqstandaǵy qoimalarda kóbirek saqtalatyn bolsa, bul qazaqstandyq satyp alýshylar úshin keibir ónimderdiń jetkizý merzimin qysqartýy yqtimal. Alaida kompaniia ázirge jetkizý ýaqyty nemese baǵasy ózgeretini týraly málimdegen joq.
Wildberries ne deidi?
RWB kompaniiasy Qazaqstanda shuǵyl túrde 100 myń sharshy metr qoima izdep jatqanyn resmi túrde rastaǵan joq. Kompaniia ókilderi logistikalyq infraqurylymdy barlyq jumys isteitin elderde josparly túrde damytyp jatqanyn málimdedi.
Qazirgi ýaqytta Wildberries Almatyda aýdany 100 myń sharshy metrden asatyn logistikalyq keshen salyp jatyr. Sonymen qatar Astanada 160 myń sharshy metrlik taǵy bir keshenniń qurylysy júrgizilýde. Onyń iske qosylýy 2027 jylǵa josparlanǵan.
Wildberries Qazaqstan da elde 100 myń sharshy metr qoimany shuǵyl izdep jatqany týraly aqparatty rastamady. Biraq kompaniia taýarlardyń logistikalyq ortalyqtar arasynda qaita bólinip jatqanyn habarlady.
«Kompaniia jumys isteitin barlyq elde logistikalyq nysandardy josparly túrde salyp jatyr. Olardyń bir bóligi jaqyn arada paidalanýǵa beriledi. Qazirgi tańda negizgi kúshimiz taýarlardy ártúrli qoimalar arasynda tiimdi ornalastyryp, seriktesterimizdiń turaqty jumysyn qamtamasyz etýge baǵyttalǵan», – dep málimdedi kompaniia Finratings.kz basylymyna.
Osylaisha, Wildberries taýar aǵyndarynyń qaita uiymdastyrylyp jatqanyn rastaǵanymen, Qazaqstandy jańa rezervtik logistikalyq hab retinde tańdaǵanyn resmi túrde jariialaǵan joq. Sondyqtan 100 myń sharshy metr qoima jaldaý týraly aqparat ázirge naryqtaǵy derekkózderdiń málimeti bolyp otyr.
Eger bul jospar júzege assa, Qazaqstan Wildberries úshin tek satý naryǵy ǵana emes, mańyzdy rezervtik logistikalyq ortalyqtardyń birine ainalýy múmkin. Alaida sarapshylardyń aitýynsha, mundai aýqymdy suranys eldegi qoima naryǵyna eleýli salmaq túsiredi, óitkeni qajetti kólemdegi bos nysandar is júzinde joq.
