Reseide Memlekettik dýma sailaýynan keiin jańa mobilizatsiia jariialanýy múmkin degen alańdaýshylyq kúsheiip, keibir Kreml sheneýnikteri men áskerge shaqyrý ortalyqtarynyń qyzmetkerleri týystaryna elden ketýge keńes bergen, dep habarlaidy dalanews.kz.
Bloomberg agenttiginiń málimetinshe, sońǵy ailarda Kremldegi keibir sheneýnikter shetelde bank shottaryn ashyp, aktivterin Reseiden tys jerge shyǵarýdyń joldaryn izdegen. Osyndai áreketter áskerge adam jinaý ortalyqtarynyń qyzmetkerleri arasynda da baiqalǵan. Bloomberg bul aqparatty óz qolyna túsken qujattar men derekkózderge súienip habarlady.
Eýropalyq qaýipsizdik qurylymdarynyń bir ókili Bloomberg-ke Resei jyl sońyna deiin Ýkrainadaǵy soǵysqa qosymsha 300 myń adamdy jiberýge daiyndalyp jatqanyn aitqan. Alaida Resei prezidenti Vladimir Pýtin mobilizatsiia týraly qaýesetterdi buǵan deiin «tolyq sandyraq» dep ataǵan.
Bloomberg derekkóziniń aitýynsha, Pýtin ázirge jańa mobilizatsiia ótkizý týraly túpkilikti sheshim qabyldamaǵan. Sondyqtan 300 myń adam týraly aqparat Resei biliginiń resmi jospary emes, Bloomberg keltirgen eýropalyq sheneýniktiń málimdemesi bolyp otyr.
Bul joly Kreml 2022 jylǵydai jappai mobilizatsiiany resmi túrde jariialamai, áskeri esepke alýdyń tsifrlyq júiesin paidalanýy múmkin degen boljam bar. Bloomberg málimetinshe, Reseide áskeri mindettiler týraly biryńǵai elektrondy reestr salyq qyzmeti, Ishki ister ministrligi, meditsinalyq málimetter, múlik jáne shekaralyq baqylaý bazalarymen bailanystyrylǵan.
Júie elektrondy shaqyrtýlar jiberýge jáne áskeri qyzmetke shaqyrylǵan azamattardyń elden shyǵýyna shekteý qoiýǵa múmkindik beredi. Osyǵan bailanysty jańa shaqyrý naýqany dástúrli qaǵaz shaqyrtý arqyly emes, tsifrlyq formatta júrgizilýi múmkin degen pikir aitylyp otyr.
Reseide jańa mobilizatsiia týraly qaýeset parlament sailaýy qarsańynda kúsheidi. Búgin, 18 qyrkúiekte elde Memlekettik dýma sailaýy bastaldy. Daýys berý úsh kúnge sozylady. Bul – Reseidiń 2022 jyly Ýkrainaǵa qarsy tolyq aýqymdy soǵys bastaǵannan keiingi alǵashqy parlamenttik sailaýy.
Buǵan deiin de Reseide sailaýdan keiin jańa mobilizatsiia bastalýy múmkin degen aqparat taraǵan. Pýtin qyrkúiek aiynyń basynda mundai jospar týraly habarlardy joqqa shyǵarǵan. 2022 jylǵy qyrkúiekte Resei prezidenti 300 myń rezervtegi áskeri qyzmetshini ishinara mobilizatsiialaý týraly jarlyqqa qol qoiǵan bolatyn.
Qazirgi tańda Resei armiiasy ásker sanyn negizinen kelisimshart boiynsha qyzmetke qabyldaý arqyly tolyqtyryp keledi. Bloomberg deregine sáikes, 2026 jyldyń alǵashqy jartysynda Resei qarýly kúshterine shamamen 234 myń adam kelisimshartpen qabyldanǵan. Bul ótken jyldyń sáikes kezeńindegi 260 myń adamnan az.
Osylaisha, Reseide jańa mobilizatsiianyń naqty jariialanǵany týraly aqparat joq. 300 myń adamdy áskerge shaqyrý týraly málimet ázirge Bloomberg keltirgen derekkózdiń baǵalaýyna negizdeledi, al Kreml mundai jospardyń bar ekenin resmi túrde rastaǵan joq.
