Resei prezidenti Vladimir Pýtin Qytaiǵa eki kúndik resmi saparmen keldi. Ol Beijińdegi Shoýdý halyqaralyq áýejaiyna qondy, dep habarlaidy dalanews.kz.
TASS agenttiginiń málimetinshe, áýejaida Resei men Qytaidyń memlekettik týlary kóterilip, qurmet qaraýyly sap túzegen.
Si Tszinpin Pýtindi Tiananmen alańynda qarsy aldy
Qytai tóraǵasy Si Tszinpin Resei prezidentin Beijińdegi Tiananmen alańynda qarsy alǵan. Alań eki eldiń týlarymen bezendirilgen. Sondai-aq memleket basshylaryn qurmet qaraýyly, áskeri orkestr jáne qoldaryna eki eldiń jalaýyn ustaǵan balalar gúl shoqtarymen qarsy alǵan.
«Álemdik basqarý júiesi ádilettirek bolýy kerek»
Kelissózderdiń basynda Si Tszinpin qazirgi halyqaralyq jaǵdaidy «turaqsyz ári kúrdeli» dep sipattady.
«Qazirgi tańda halyqaralyq ahýal kúrdeli bolyp tur. Birjaqtylyq pen gegemoniia kúsheiip barady. Soǵan qaramastan beibitshilikke, damýǵa jáne yntymaqtastyqqa umtylý halyqtardyń basty talaby bolyp qala beredi», – dedi Qytai basshysy.
Ol Qytai men Resei BUU Qaýipsizdik keńesiniń turaqty músheleri ári iri derjavalar retinde jahandyq basqarýdyń ádilettirek júiesin qalyptastyrýy qajet ekenin aitty.
Resei men Qytai vizasyz rejimdi jalǵastyrady
Kelissóz barysynda Vladimir Pýtin Resei men Qytai azamattaryna arnalǵan vizasyz rejim tájiribesi jalǵasatynyn málimdedi. Onyń aitýynsha, bul sheshim eki el arasyndaǵy gýmanitarlyq bailanysty nyǵaitýǵa yqpal etip otyr.
«Qurmetti dosym, sizdiń bastamańyzben engizilgen ózara vizasyz rejim gýmanitarlyq bailanystardy damytýǵa qosymsha serpin berdi. Bul tájiribeni biz mindetti túrde jalǵastyramyz», – dedi Pýtin Qytai tóraǵasymen kezdesý kezinde.
