Raiymbek aýdanynda 423 az qamtylǵan jáne 829 kópbalaly otbasy bar. Solardyń biri Saryjaz aýylyndaǵy kópbalaly Isaevtar áýleti. Uzaq jyldar boiy páter jaldap kelgen januiaǵa alty bólmeli baspananyń kiltin sol aýyldyń O.Ateev, T.Tólemisov, N.Chýbanov, B.Keikeev, E.Júnisbekov, O.Ábdirazaqov, aǵaiyndy Ǵalym, Naryn syndy kásipker azamattary demeýshilik jasap, syiǵa tartty. Isaevtar áýleti 7 balany tárbielep otyr. Úlkeni 2002 jylǵy, Talǵar qalasyndaǵy pedagogikalyq kolledjdiń bilimgeri bolsa, úidiń kenjesi 2016 jyly dúniege kelgen.
– Elbasy «Nur Otan» partiiasynyń XVIII sezinde «kópbalaly jáne turmysy tómen otbasylarǵa degen qoldaýdy kúsheitý kerektigin» aitqan bolatyn. Osy tapsyrma aiasynda, oblys ákiminiń ózi jyl basynda qaiyrymdylyq marafonyn bastap ketti. Endi sol qýanysh toiy bizdiń aýylǵa da kelip jetti. Osy úidi satyp berip jatqan aýdan kásipkerlerine zor alǵysymdy bildiremin. Jańa qonys kópbalaly otbasylarǵa qut bolyp, osy shańyraqtan elimizdiń igiligine qyzmet etetin perzentter ósip-ónsin, – dedi, aýdan basshysy.
Sondai-aq demeýshiler kópbalaly januiaǵa úi jihazdary men balalarǵa oiynshyqtaryn syiǵa tartty. Balalardyń júzine qýanysh ornap máz-meiram bolsa, analar kóz jasyna erik berdi.
«Kópten bergi tilegimiz oryndalyp, qaiyrymdy jandardyń arqasynda oiymyzdaǵydai baspanaǵa qol jetkizip, qýanyshqa kenelip jatyrmyz. El basqarǵan basshylarǵa, qaiyrymdy azamattarǵa aitar alǵysym sheksiz. Analyq aq nietimmen elimizdiń birligi ydyramai, kemel bolashaqqa jetýdi tileimin», – dedi Sholpan Qurmanjanqyzy.
Sonymen qatar Raiymbek aýdanynyń ákimi Jolan Omarov, máslihat hatshysy Erlan Qudabaev, aýdandyq aqsaqaldar alqasynyń tóraǵasy Bekbolat Birbaev bastaǵan kásipkerler Shalkóde, Qaqpaq, Jambyl, Tegistik, Súmbe aýyldyq okrýgterin de aralap, kómekke muqtaj otbasylarǵa baspana kiltin tabys etti.
Keń bólmeli, baqshasynda jemis-jidegi egilgen baspanaǵa qoly jetken búldirshinderdiń qýanyshynda shek bolmady.
Aýdan basshysy bul igi is ana men balaǵa jasalǵan qamqorlyqtyń bir parasy ǵana ekenin, mundai qoldaýlar men kómekke muqtaj otbasylarǵa qamqorlyq áli de jalǵasa beretinin aitty.
Eske salaiyq, jyl basynan Almaty oblysynyń kásipkerleri kópbalaly jáne az qamtylǵan otbasylarǵa 90-ǵa jýyq baspana syilaǵan.
Baljan Qairatqyzy, Almaty oblysy
