Búgin Qyzylorda qalasyndaǵy «Qorqyt ata» memorialdy alleiasynda «Jasyl el» jastar eńbek jasaqtarynyń kezekti eńbek maýsymynyń saltanatty ashylý rásimi ótti, dep habarlaidy dalanews.kz.
Ashylý saltanatyna oblystyq qoǵamdyq damý basqarmasynyń basshysy Rýslan Kaiýpov, jastar uiymdarynyń ókilderi, eriktiler, eńbek jasaqtarynyń sarbazdary jáne belsendi jastar qatysty.
Saltanatty jiynda basqarma basshysy jastardy jańa eńbek maýsymynyń bastalýymen quttyqtap, «Jasyl el» jobasynyń qoǵamdaǵy mańyzy men tárbielik mánine erekshe toqtaldy.
Sonymen qatar, qorshaǵan ortany qorǵaý, týǵan jerdi taza ustaý jáne ekologiialyq mádenietti qalyptastyrý baǵytynda jastarmen tushymdy oi-pikirlerimen bólisti.
«Jasyl el» – bul tek maýsymdyq jumys nemese ýaqytsha eńbek alańy ǵana emes. Bul – jastardyń týǵan jerge degen súiispenshiligin arttyryp, eńbekqorlyq pen jaýapkershilik qasietterin qalyptastyratyn mańyzdy qoǵamdyq bastama.
Memleket basshysy Qasym-Jomart Kemeluly Toqaev «Tazalyq – órkenietti qoǵamnyń ainasy, damýǵa umtylǵan kez kelgen eldiń myzǵymas ustanymy. Aq peiilmen, túzý nietpen qolǵa alǵan árbir is berekeli bolady» dep atap ótken bolatyn.
Búginde «Jasyl el» sarbazdary qajetti arnaiy kiimdermen, qural-jabdyqtarmen jáne eńbekke qajetti barlyq jabdyqtarmen tolyq qamtamasyz etilýde.
Bul – jastardyń qaýipsiz ári nátijeli eńbek etýine jasalǵan naqty qoldaý. Sizderdi týǵan jerimizdiń gúldenýi jolynda aianbai eńbek etýge, tabiǵatty aialaýǵa, qorshaǵan ortaǵa janashyrlyqpen qaraýǵa jáne qoǵamdyq tazalyq mádenietin qalyptastyrýǵa shaqyramyn», – dedi Rýslan Muhamedáliuly.
Shara barysynda jastarǵa arnaiy eńbek quraldary men qajetti jabdyqtar tabystaldy. Sonymen qatar, eńbek jasaqtarynyń músheleri «Qorqyt ata» memorialdy alleiasy aýmaǵynda tazalyq jumystaryn júrgizip, abattandyrý isine belsendi atsalysty.
Sondai-aq, «Taza Qazaqstan» jalpyulttyq ekologiialyq baǵdarlamasyna belsendi qatysyp júrgen birqatar jastar oblys ákiminiń arnaiy «Alǵys hattarymen» marapattaldy. Aita ketý qajet, «Jasyl el» jobasy jastardy maýsymdyq jumyspen qamtyp qana qoimai, olardy eńbekke baýlý, týǵan jerge janashyrlyqpen qaraý jáne ekologiialyq mádenietti qalyptastyrý baǵytynda mańyzdy ról atqaryp keledi.
Búginde bul bastama jastardyń qoǵamdyq belsendiligin arttyryp, el damýyna óz úlesin qosatyn mańyzdy áleýmettik jobaǵa ainaldy.
#tazaQazaqstan
Qyzylorda oblysynyń qoǵamdyq damý basqarmasy
