«Balalardyń sabaqtan tys ýaqytyn tiimdi ótkizý jáne jańa tehnologiialardy meńgerýine jaǵdai jasaý maqsatynda Qyzylorda qalasynyń Ál-Farabi shaǵyn aýdanynda 7 mlrd. teńgege 360 oryndyq innovatsiialyq shyǵarmashylyq ortalyǵynyń qurylysy biyl bastalyp, 2027 jyly paidalanýǵa beriledi».
Bul týraly oblys ákimi Murat Ergeshbaev bilim qyzmetkerleriniń dástúrli tamyz konferentsiiasynda aitty.
Buǵan deiin mundai ortalyq «Syr juldyzdary» degen atpen qalanyń basqa shaǵyn aýdanynda ashylyp, jetkinshekterdiń bos ýaqytyn ótkizetin qosymsha bilim berý uiymyna ainalǵan bolatyn. Endi Qyzylordanyń taǵy bir shaǵyn aýdanynda boi kótermek.
Memleket basshysynyń, Úkimettiń erekshe qoldaýymen óńirde bilim berý infraqurylymy jańǵyrýda. 2022 jyldan beri 121 mlrd. teńgeden astam qarjyǵa 46 zamanaýi bilim berý nysany salynyp, el igiligine tabystaldy.
Aimaqta kóp jyldan beri ózekti bolǵan úsh aýysymdy mektepter máselesi tolyq sheshildi. Biyl «AI-Kerim» balalar bilim berý-saýyqtyrý ortalyǵy paidalanýǵa berildi. Ortalyq jyl saiyn 8 400 balany qamtyp, robototehnika, baǵdarlamalaý, injenerlik jobalaý jáne basqa da zamanaýi daǵdylardy úiretýde.
Jańadan ashylǵan Botanikalyq bilim berý ortalyǵynda oqýshylar biologiia, ekologiia jáne botanika baǵyttaryn tájiribe júzinde meńgerýde. Balalardyń ǵylymǵa qyzyǵýshylyǵyn arttyrýda osyndai jobalardyń mańyzy erekshe.
