Aýyl sharýashylyǵy ministri Aidarbek Saparov "qiiar men qyzanaqtyń tapshylyǵyn joiý úshin ne istelip jatyr?" degen saýalǵa jaýap berdi, dep habarlaidy Dalanews.kz.
Biyl kartop baǵasy ǵana emes, elde ósiriletin qiiar-qyzanaq ta qymbattaǵan. Tipti tropikalyq jemis banannan da qymbat bolyp, kelisi 1300 teńgege deiin jetken.
Ministr alda tekseris júrgiziletinin málimdedi.
"Ár núktede baǵa ártúrli bolyp jatyr. Bul jerde tekseris jumysyn kúsheitý kerek. Bir juma buryn saýda ministrimen kezdesip, osy jumysty biraz talqyladyq. Ár oblysta saýda departmentteri bar. Olar oblyspen jumysty atqaryp, saýda núktelerin aralap, qarap, baǵalardy naqtylaýy kerek. On bes paiyzdan joǵary bolmaýy kerek. Osy jaǵynan jumysty kúsheitý kerek, sondai kelisimge keldik. Endigi jumada bul jumys bastalyp ketedi", - dep jaýap berdi ministr.
Úkimettegi brifingte BAQ ókili elde qazaqstandyq ónim tapshy ekenin, 20-30 paiyz kóleminde qiiar men qyzanaq Qytaidan keletinin aitty. Ministrge "tapshylyq qalai joiylady?" degen saýal joldandy.
"Tapshylyqty joiý boiynsha buryn 1 mln 600 myń gektar jylyjai bolsa, qazir eki úlken jylyjai salynyp jatyr. Bes júz gektardan. Shymkentte jáne Túrkistan oblysynda. Osymen tapshylyq joiylady. Eldi qamtý kólemi júz paiyzǵa deiin jetedi", - dep sendirdi sheneýnik.
Eske salaiyq, buǵan deiin Aýyl sharýashylyǵy ministri Aidarbek Saparov biyl elimizde aýyl sharýashylyǵy daqyldary egiletin jer kólemi ótken jylmen salystyrǵanda 518 myń gektarǵa artatynyn málimdegen bolatyn.
Ministrdiń aitýynsha, aýyl sharýashylyǵy ónimin eki ese ulǵaitý jónindegi jol kartasy aiasynda egis alqaptaryn ártaraptandyrý jumystary jalǵasady. Barlyq tiisti kórsetkish ákimdikterge jetkizilgen.
