Májilis depýtaty Serik Erýbaev Úkimetke joldaǵan depýtattyq saýalynda el azamattarynan banktik shottardyń buǵattalýyna qatysty kelip túsetin shaǵymdardyń kóp ekenin aitady, dep habarlaidy Dalanews.kz.
Bul búgingi kúnniń ózekti máseleleriniń biri bolyp tabylatynyn aitqan depýtat, sonymen qatar atalǵan jait azamattardyń qarjylyq quqyqtarynyń buzylýynyń da aiqyn dáleli ekenin basa atap ótti.
"Qazirgi tańda turǵyndardyń salyq, aiyppul nemese kommýnaldyq tólemder jáne taǵy basqa bereshegi bolǵan jaǵdaida, sot oryndaýshysy qaryzdyń naqty mólsheri men buǵattaý somasynyń aiyrmashylyǵyna qaramastan, banktik shotty tutastai buǵattaidy. Mysaly, azamattyń shotynda – 300 000 teńge bar, qaryz – bar bolǵany 50 000 teńge. Nátijesinde – tolyǵymen 300 000 teńge buǵattalady. Bundai shamadan tys áreketter, azamattyń kúndelikti qajettilikterin óteý múmkindiginen aiyrady, atap aitqanda, tamaq, dári-dármek satyp alý jáne t.b. kúndelikti tirshilikke qajetti zattarynan", - deidi ol.
Onyń aitýynsha, sot oryndaýshylary jii júginetin banktik esep shottardy tolyǵymen buǵattaý tásili "Atqarýshylyq is júrgizý jáne sot oryndaýshylarynyń mártebesi týraly" Zańynda,qarastyrylǵan.
"Mundai tásil sot oryndaýshylarynyń óz ókilettikterin asyra paidalanyp, azamattardyń konstitýtsiialyq quqyqtaryna nuqsan keltirip, olardy sharasyz kúige túsiredi. Tipti, qaryz somasy jabylǵan jaǵdaidyń ózinde, mán-jáidi anyqtap, banktik shotty buǵattan bosatý úshin sot oryndaýshysyna 2-3 kún ýaqyt ketip qalýy múmkin. Al, shotty buǵattaý sáti demalys, mereke kúnderine nemese azamat shetelde júrgen kezine túsetin bolsa, bul máseleni odan ári qiyndata túsedi. Onyń ústine, istiń sanatyna bailanysty óndirip alý somasynyń 25 paiyzǵa deiin jetetin sot oryndaýshysynyń tólemaqysy taǵy bar", - deidi Erýbaev.
Memleket basshysy Qasym-Jomart Toqaev 2024 jylǵy 2 qyrkúiektegi Qazaqstan halqyna Joldaýynda bul máselege nazar aýdaryp, azamattardyń shottaryn tolyq buǵattaý tájiribesin toqtatýdy tapsyrǵan bolatyn. Alaida tapsyrma berilgeli bir jylǵa jaqyn ýaqyt ótse de, bul salada naqty (oń) ózgerister baiqalmai tur.
"Halyqtyń áleýmettik ál-aýqatyn oilaityn memleket óz azamattaryn jazyqsyz shektemei, ádilettilik pen quqyqtyq tepe-teńdikti qamtamasyz etýge tiis dep esepteimiz" degen depýtat osyǵan bailanysty, bul rette mynandai talaptardy alǵa tartatyndaryn jetkizdi:
- Qaryz mólsherine sáikes, shottaǵy qarjyny ishinara buǵattaý tártibin zańnamama júzinde bekitý;
- Shottardy buǵattaý týraly qaýlyda naqty somany kórsetýdi memlekettik organdar men sottar úshin mindetteý;
- Azamattardyń banktik shottaryna shekteýler engizilmei turyp, qaryzdy óz erkimen óteý merzimin belgilep, buǵattaý jóninde aldyn-ala habarlaýdy mindetti túrde qamtamasyz etý.
Buǵan deiin Májiliste depýtattar ekinshi deńgeidegi bankterge (EDB) turǵyn úi qurylys jinaq júiesine qatysýǵa múmkindik berýdi suraǵanyn jazǵanbyz.
