Qazaqstanda bankter depozitter boiynsha syiaqy mólsherlemesin tómendetýge kiristi. Bul ózgeris Ulttyq banktiń bazalyq mólsherlemeni tómendetý týraly sheshiminen keiin bastaldy, dep habarlaidy dalanews.kz.
Qazaqstannyń depozitterge kepildik berý qorynyń málimetinshe, maýsym aiynda eń úlken ózgerister jinaq depozitterinde, ásirese tolyqtyrý múmkindigi joq depozitterde baiqalǵan. Sebebi dál osy ónimder boiynsha tabystylyq eń joǵary deńgeide bolǵandyqtan, bankter aldymen osy segmenttegi mólsherlemelerdi qaita qaraǵan.
Mólsherlemelerdiń eń aitarlyqtai tómendeýi orta jáne uzaq merzimdi depozitterde tirkeldi. Sarapshylar muny bankterdiń uzaq merzimde qarjylandyrý qunynyń odan ári arzandaitynyn kútýimen bailanystyrady.
Sonymen qatar qor bankterdiń depozittik saiasatynda ózgerister birden bolmaitynyn atap ótti. Sebebi ár qarjy uiymy óz ishki saiasatyna sai sheshim qabyldaidy, al keibir bankter básekelesteriniń áreketin baqylap, kútý taktikasyn ustanyp otyr.
Osyǵan bailanysty depozitter boiynsha mólsherlemelerdiń tómendeý úrdisi kelesi aida da jalǵasýy múmkin. Buǵan qosa, 2026 jylǵy 24 shildede Ulttyq bank bazalyq mólsherleme boiynsha kezekti sheshimin jariialaidy. Bul bólshek depozitter naryǵyndaǵy mólsherlemelerdiń odan arǵy dinamikasyna áser etedi.
Soǵan qaramastan, teńgedegi depozitterdiń tabystylyǵy áli de joǵary deńgeide qalyp otyr. Ásirese qysqa merzimdi depozitter boiynsha kiristilik tartymdy bolyp qala beredi. Qordyń túsindirýinshe, bul bankterdiń básekege qabilettilikti saqtap, halyqtyń ulttyq valiýtadaǵy jinaqtarǵa qyzyǵýshylyǵyn qoldaýǵa tyrysyp jatqanyn kórsetedi.
Eske salaiyq, 2026 jylǵy 5 maýsymda Ulttyq bank bazalyq mólsherlemeni 17%-ǵa deiin tómendetken bolatyn. Osydan keiin maýsym aiynda 10 bank depozitter boiynsha syiaqy mólsherlemelerin qaita qarady. Ózgerister depozitterdiń barlyq túrine áser etkenimen, eń úlken tómendeý jinaq depozitteri segmentinde tirkeldi. Keibir bankter depozit merzimine qarai mólsherlemelerdi bir jerde tómendetse, kei jerde kerisinshe kótergen.
