Jańa oqý jyly bastalysymen áleýmettik jelilerde qyrkúiek aiynyń qazaqsha ataýyn qalai durys jazý kerek degen másele qaita qyzý talqylana bastady. Pikirtalas «qyrkúiek» pen «qyrgúiek» nusqalarynyń tóńireginde órbidi, dep habarlaidy dalanews.kz.
Sońǵy kúnderi jelide qyrkúiek sóziniń jazylýyna qatysty ondaǵan jazba jariialandy. Buǵan mektep dápterleri men oqýlyqtaryndaǵy burynnan qoldanylyp kelgen «qyrkúiek» nusqasynyń ornyna «qyrgúiek» sóziniń jazylýy sebep bolǵan.
Aita keteiik, bul másele alǵash ret 2018 jyly talqyǵa túsken. Keiin 2021 jáne 2024 jyldary da qaita kóterilip, ata-analar mektep materialdaryndaǵy sózdiń jazylýyna nazar aýdarǵan bolatyn.
Bir qyzyǵy, keibir muǵalimder oqýshylardyń jazǵan «qyrkúiek» sózindegi «k» árpin «g»-ge túzetip jatqanymen, memlekettik organdardyń ózderi resmi qujattar men habarlamalarda kóbine «qyrkúiek» nusqasyn qoldanady.
Máselen, Ǵylym jáne joǵary bilim ministrligi men Oqý-aǵartý ministrliginiń resmi habarlamalarynda «qyrkúiek» sózi jii kezdesedi. Sondai-aq vedomstvolardyń Telegram-arnalarynda «qyrgúiek» sózi qoldanylǵan jariialanymdar baiqalmaidy.
Osyǵan bailanysty Ǵylym jáne joǵary bilim ministrliginiń Til saiasaty komiteti resmi túsinikteme berdi. Komitettiń málimetinshe, orfografiialyq sózdikke sáikes durys nusqa – «qyrgúiek». Til saiasaty komiteti Ahmet Baitursynuly atyndaǵy Til bilimi institýty ázirlegen 2013 jylǵy orfografiialyq sózdikke silteme jasap, qyrkúiek aiynyń ataýy qazaq tilinde «qyrgúiek» dep jazylatynyn habarlady.
Alaida komitet bul sózdiń jazylý normasy ár kezeńde ózgergen-ózgermegenin jáne atalǵan máselege qatysty til mamandary arasynda pikir qaishylyǵy bar-joǵyn naqtylamady.
