Qyrǵyzstan Qazaqstannan benzin jetkizý múmkindigin qarastyrýdy surady. Alaida túpkilikti sheshim áli qabyldanǵan joq. Bul týraly Energetika vitse-ministri Qaiyrhan Tutqyshbaev málimdedi, dep habarlaidy dalanews.kz.
Onyń aitýynsha, Qyrǵyzstan tarapynan resmi ótinish Energetika ministrligine kelip túsken.
«Qyrǵyzstan tarapynan resmi suranys tústi. Qazir ony qarap jatyrmyz. Barlyq sheshim ulttyq múdde men ishki naryqtaǵy teńgerimdi eskere otyryp qabyldanady», – dedi vitse-ministr.
Ministrlik eń aldymen Qazaqstannyń ishki naryǵyn qamtamasyz etý basymdyq bolyp qala beretinin atap ótti. Sondyqtan janarmai eksporty týraly sheshim eldegi qor jetkilikti bolǵan jaǵdaida ǵana qabyldanady.
Sonymen qatar jýrnalister Resei men Qyrǵyzstanda benzin tapshylyǵy baiqalyp otyrǵanyn, al Atyraý munai óńdeý zaýyty jóndeýde turǵanyn eske salyp, mundai jaǵdaida Qazaqstanda janarmai qymbattap ketpei me degen suraq qoidy.
Qaiyrhan Tutqyshbaev mundai qaýip joq ekenin aitty.
«Qyrǵyzstannyń suranysyn qanaǵattandyrý el ishindegi benzin baǵasynyń ósýine ákelmeidi. Muny resmi túrde málimdeimin», – dedi ol.
Vitse-ministrdiń aitýynsha, qazirgi ýaqytta Reseiden Qazaqstanǵa janarmai jetkizý týraly resmi ótinish túspegen. Eger ondai suranys kelse, ol da ulttyq múdde men ózara tiimdilik qaǵidattary negizinde jeke qaralady.
Sonymen birge Energetika ministrligi Qazaqstannan naqty qansha kólemde benzin syrtqa shyǵarylǵany jóninde statistika júrgizbeitinin habarlady.
«Biz qansha óndiriletinin jáne qansha tutynylatynyn bilemiz. Al syrtqa shyǵarylǵan kólem boiynsha derekter basqa memlekettik organdardyń quzyretine jatady», – dedi Qaiyrhan Tutqyshbaev.
Eske salaiyq, buǵan deiin Qyrǵyzstannyń Energetika ministrligi álemdik naryqtaǵy jaǵdaiǵa bailanysty Qazaqstan men birqatar elderden benzin jetkizý múmkindigin qarastyrýdy surap resmi ótinish joldaǵan bolatyn.
