Alaida áriptester quttyqtaýdyń ornyna búgin kóńil aityp jatyr.
Búgin Jambyl oblysyndaǵy injenerlik oq-dári qoimasynda bolǵan órttiń saldarynan tórt áskeri qyzmetkerdiń qaza tapqany belgili boldy. Dostary, áriptesteri marqumdar jaily jazbalarymen bólisip jatyr.
Jambyl oblysyndaǵy áskeri bólimde bolǵan órt týraly habar jetisimen, oqiǵanyń naǵyz oshaǵyna alǵashqylardyń biri bolyp jetken ol adam shyǵynyn boldyrmas úshin jantalas kezinde ózi ólim qushty.
Ol óz isimen bizge Otan aldyndaǵy boryshyn ótegen, antqa adal naǵyz prokýrordyń, ofitserdiń úlgisi ekenin tanytyp ketti.
Ainalamyzda boryshyn oryndaý úshin óz ómirin berýge daiyn osyndai adal joldastar barda biz óz qyzmetimizdi abyroimen atqara beremiz, bizge odan basqa eshteńe kerek emes, - dep jazady áriptesteri Facebook-te.
...
Jambyl oblysyndaǵy injenerlik oq-dári qoimasynda bolǵan órttiń saldarynan tórt áskeri qyzmetker qaza tapty.
Jambyl oblysyndaǵy injenerlik oq-dáriler qoimasynda órt saldarynan kelisimshart boiynsha eki áskeri qyzmetshi – 1981 jyly týǵan serjant Marat Sailaýuly Meshinbai jáne 1981 jyly týǵan efreitor Rýslan Júrsinbaiuly Janbolatov, 1969 jyly týǵan áskerilendirilgen kúzet qyzmetshisi azamat Orazbek Daiyrbekuly Dalibaev qaza tapty, - deidi QR Qorǵanys ministrliginiń baspasóz qyzmeti.
Tórtinshi marqum áskeri qyzmetker - ońtústik óńirdiń áskeri prokýrory, polkovnik Arman Qapezov.
Quzyrly vedomstva málimetinshe, Serjant Marat Meshinbai men efreitor Rýslan Janbolatov órttiń alǵashqy minýttarynan bastap áskeri bólimniń órt sóndirý komandasynyń quramynda boldy. Jarylystardyń janynda bolyp, olar aýyr jaraqattar aldy.
Áskerilendirilgen kúzet qyzmetshisi Orazbek Dalibaev qoimany kúzetý jónindegi qaraýyl bastyǵynyń kómekshisi qyzmetin atqardy. Qyzmettik mindetterin atqarýda oq-dárilerdiń jarylýy saldarynan qaza tapty, dep naqtylady baspasóz qyzmeti.
Qorǵanys ministrligi qaza bolǵandardyń týystary men jaqyndaryna qaiǵyryp kóńil aitady. Qorǵanys vedomstvosy tarapynan qaza tapqandardyń otbasylaryna kómek kórsetý boiynsha barlyq sharalar qabyldanatyn bolady.
26 tamyzda Jambyl oblysy, Baizaq aýdanynda ornalasqan áskeri bólimdegi qoimalardyń biriniń janynda órt shyqty. Qorǵanys ministrligi 10-ǵa jýyq jarylys bolǵanyn habarlady.
Qazaqstan Prezidenti Qasym-Jomart Toqaev Taraz qalasy men oǵan jaqyn ornalasqan aýyldardyń turǵyndaryna jarylysqa bailanysty úndeý tastady.
Osy sátte...
Jambyl oblysy Baizaq aýdanyndaǵy áskeri qoima jarylysynan qaza bolǵandar kóbeie bastady. Buǵan deiingi 4 adamnyń jarylystan qaza bolǵany habarlanǵan edi.
Jambyl oblysynda júrgen Azattyq tilshisi Manas Qaiyrtaiuly:
- Jarylys saldarynan órt sóndirýshi Eldos Sandybaevtyń qaza bolǵany anyqtaldy. Onyń dosy qazir osy jerde júr. Ata-anasy úiine jylap ketti, dep habarlady.
Osy ýaqytta Qazaqstan Qorǵanys ministrligi jarylystan qaza bolǵan basqa adamnyń aty-jónin atap, málimdeme taratty.
- Órt sóndirý komandasynyń bastyǵy, kelisim-shart qyzmetiniń starshinasy 1992 jyly týǵan Erkin Nádirbekov órt sóndirý kezindegi jarylys kezinde kóz jumdy. Ol 27 tamyz kúni tańerteń habarsyz ketken áskeri qyzmetshiler tiziminde bolatyn,-deidi Qorǵanys ministrligi.
