الايدا ارىپتەستەر قۇتتىقتاۋدىڭ ورنىنا بۇگىن كوڭىل ايتىپ جاتىر.
بۇگىن جامبىل وبلىسىنداعى ينجەنەرلىك ءوق-دارى قويماسىندا بولعان ءورتتىڭ سالدارىنان ءتورت اسكەري قىزمەتكەردىڭ قازا تاپقانى بەلگىلى بولدى. دوستارى، ارىپتەستەرى مارقۇمدار جايلى جازبالارىمەن ءبولىسىپ جاتىر.
جامبىل وبلىسىنداعى اسكەري بولىمدە بولعان ءورت تۋرالى حابار جەتىسىمەن، وقيعانىڭ ناعىز وشاعىنا العاشقىلاردىڭ ءبىرى بولىپ جەتكەن ول ادام شىعىنىن بولدىرماس ءۇشىن جانتالاس كەزىندە ءوزى ءولىم قۇشتى.
ول ءوز ىسىمەن بىزگە وتان الدىنداعى بورىشىن وتەگەن، انتقا ادال ناعىز پروكۋروردىڭ، وفيسەردىڭ ۇلگىسى ەكەنىن تانىتىپ كەتتى.
اينالامىزدا بورىشىن ورىنداۋ ءۇشىن ءوز ءومىرىن بەرۋگە دايىن وسىنداي ادال جولداستار باردا ءبىز ءوز قىزمەتىمىزدى ابىرويمەن اتقارا بەرەمىز، بىزگە ودان باسقا ەشتەڭە كەرەك ەمەس، - دەپ جازادى ارىپتەستەرى Facebook-تە.
...
جامبىل وبلىسىنداعى ينجەنەرلىك ءوق-دارى قويماسىندا بولعان ءورتتىڭ سالدارىنان ءتورت اسكەري قىزمەتكەر قازا تاپتى.
جامبىل وبلىسىنداعى ينجەنەرلىك وق-دارىلەر قويماسىندا ءورت سالدارىنان كەلىسىمشارت بويىنشا ەكى اسكەري قىزمەتشى – 1981 جىلى تۋعان سەرجانت مارات سايلاۋ ۇلى مەشىنباي جانە 1981 جىلى تۋعان ەفرەيتور رۋسلان ءجۇرسىنباي ۇلى جانبولاتوۆ، 1969 جىلى تۋعان اسكەريلەندىرىلگەن كۇزەت قىزمەتشىسى ازامات ورازبەك دايىربەك ۇلى داليبايەۆ قازا تاپتى، - دەيدى ق ر قورعانىس مينيسترلىگىنىڭ باسپا ءسوز قىزمەتى.
ءتورتىنشى مارقۇم اسكەري قىزمەتكەر - وڭتۇستىك ءوڭىردىڭ اسكەري پروكۋرورى، پولكوۆنيك ارمان قاپەزوۆ.
قۇزىرلى ۆەدومستۆا مالىمەتىنشە، سەرجانت مارات مەشىنباي مەن ەفرەيتور رۋسلان جانبولاتوۆ ءورتتىڭ العاشقى مينۋتتارىنان باستاپ اسكەري ءبولىمنىڭ ءورت ءسوندىرۋ كومانداسىنىڭ قۇرامىندا بولدى. جارىلىستاردىڭ جانىندا بولىپ، ولار اۋىر جاراقاتتار الدى.
اسكەريلەندىرىلگەن كۇزەت قىزمەتشىسى ورازبەك داليبايەۆ قويمانى كۇزەتۋ جونىندەگى قاراۋىل باستىعىنىڭ كومەكشىسى قىزمەتىن اتقاردى. قىزمەتتىك مىندەتتەرىن اتقارۋدا وق-دارىلەردىڭ جارىلۋى سالدارىنان قازا تاپتى، دەپ ناقتىلادى باسپا ءسوز قىزمەتى.
قورعانىس مينيسترلىگى قازا بولعانداردىڭ تۋىستارى مەن جاقىندارىنا قايعىرىپ كوڭىل ايتادى. قورعانىس ۆەدومستۆوسى تاراپىنان قازا تاپقانداردىڭ وتباسىلارىنا كومەك كورسەتۋ بويىنشا بارلىق شارالار قابىلداناتىن بولادى.
26 تامىزدا جامبىل وبلىسى، بايزاق اۋدانىندا ورنالاسقان اسكەري بولىمدەگى قويمالاردىڭ ءبىرىنىڭ جانىندا ءورت شىقتى. قورعانىس مينيسترلىگى 10-عا جۋىق جارىلىس بولعانىن حابارلادى.
قازاقستان پرەزيدەنتى قاسىم-جومارت توقايەۆ تاراز قالاسى مەن وعان جاقىن ورنالاسقان اۋىلداردىڭ تۇرعىندارىنا جارىلىسقا بايلانىستى ۇندەۋ تاستادى.
وسى ساتتە...
جامبىل وبلىسى بايزاق اۋدانىنداعى اسكەري قويما جارىلىسىنان قازا بولعاندار كوبەيە باستادى. بۇعان دەيىنگى 4 ادامنىڭ جارىلىستان قازا بولعانى حابارلانعان ەدى.
جامبىل وبلىسىندا جۇرگەن ازاتتىق ءتىلشىسى ماناس قايىرتاي ۇلى:
- جارىلىس سالدارىنان ءورت ءسوندىرۋشى ەلدوس ساندىبايەۆتىڭ قازا بولعانى انىقتالدى. ونىڭ دوسى ءقازىر وسى جەردە ءجۇر. اتا-اناسى ۇيىنە جىلاپ كەتتى، دەپ حابارلادى.
وسى ۋاقىتتا قازاقستان قورعانىس مينيسترلىگى جارىلىستان قازا بولعان باسقا ادامنىڭ ءاتى-جونىن اتاپ، مالىمدەمە تاراتتى.
- ءورت ءسوندىرۋ كومانداسىنىڭ باستىعى، كەلىسىم-شارت قىزمەتىنىڭ ستارشيناسى 1992 جىلى تۋعان ەركىن نادىربەكوۆ ءورت ءسوندىرۋ كەزىندەگى جارىلىس كەزىندە كوز جۇمدى. ول 27 تامىز كۇنى تاڭەرتەڭ حابارسىز كەتكەن اسكەري قىزمەتشىلەر تىزىمىندە بولاتىن،-دەيدى قورعانىس مينيسترلىگى.
