«Áziret Sultan» Ulttyq mýzei-qoryǵy qasietti Taiqazannyń tarihi ornyna oralǵanyna 35 jyl tolýyna orai, Túrkistan oblysy, Saýran aýdanynyń jalpy bilim beretin mektepterinde «Qut daryǵan Taiqazan» atty kóshpeli kórme uiymdastyrdy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Kórmeniń maqsaty – ortaǵasyrlyq qundy muralardy dáripteý arqyly jas jetkinshekterge tarihymyzdy tanytý, olardyń paiym-parasatyn arttyrý, ótken tarihymyzǵa degen qyzyǵýshylyǵyn oiatý.
Kórmege 50-ge jýyq jádiger qoiyldy. Olardyń qatarynda Taiqazandy qaitarý týraly arhivtik tarihi qujattar, Taiqazannyń maketteri, orys saiahatshysy A.Kýnnyń albomyndaǵy 1864 jylǵy fotosýretter, 1935 jyly Taiqazandy Sankt-Peterbýrgke alyp bara jatqandaǵy muraǵattyq sýreti, Ermitaj mýzeiiniń ekspozitsiiasyna qoiylǵan biregei fotosy jáne 1989 jyly Ermitaj mýzeiinen Taiqazandy shyǵaryp jatqan sátiniń muraǵattyq sýreti, Qoja Ahmet Iasaýi kesenesine kelgen tulǵalardyń fotosýretteri bar.
Qoja Ahmet Iasaýi kesenesinde saqtalǵan ortaǵasyrlyq asa qundy jádiger – qasietti Taiqazan 1399 jyly Túrkistannan 25 shaqyrym jerde, Qarnaq eldi mekenindegi ustahanada quiylǵan. Altyn, kúmis, mys, qola, qorǵasyn, myrysh, qalaiy syndy jeti túrli metaldyń qosyndysynan quiylǵan Taiqazandy Turannyń bileýshisi Ámir Temirdiń buiryǵymen usta Ábdil Áziz Sharafýddin Tebrizi jasaǵan.
Taiqazan 1935 jyly Leningrad, qazirgi Sankt-Peterbýrg qalasynda ótetin Iran sheberleriniń III Halyqaralyq konferentsiiasyna úsh aiǵa jiberilgenimen, 54 jyldan keiin, iaǵni 1989 jyldyń 18 qyrkúiegi kúni tarihi otanyna qaita oralǵan.
Kórmede Taiqazannyń tarihi mekenine oralýyna memleket jáne qoǵam qairatkeri, ǵalym-etnograf Ózbekáli Jánibekovtiń qosqan úlken úlesi de tarihi qujattarmen naqtylanyp, kórsetildi. Kóshpeli kórme Molda Musa jáne Áshirbek Syǵai atyndaǵy jalpy bilim beretin orta mektepterde ótkizilip, mektep ujymy men oqýshylarynyń zor qyzyǵýshylyǵyn týdyrdy.
