Qazaqstanda eńbek naryǵy men kolledjderdegi kadr daiarlaý kólemi arasynda aitarlyqtai alshaqtyq bar, dep habarlaidy dalanews.kz.
Oqý-aǵartý ministri Juldyz Súleimenova Úkimet otyrysynda tehnikalyq jáne kásiptik bilim berý júiesindegi negizgi máselelerdiń biri eńbek naryǵynyń naqty suranysyna sáikes maman daiarlaý ekenin aitty.
Ministrliktiń boljamynsha, orta merzimdi kezeńde ekonomikaǵa 1,8 mln-nan astam jumysshy maman qajet bolady. Onyń ishinde ónerkásip salasyna – 183 myń, qurylysqa – 102 myń, aýyl sharýashylyǵyna – 73 myń, IT salasyna – 12 myń maman qajet.
Eń úlken alshaqtyq qurylys jáne aýyl sharýashylyǵy salalarynda baiqalady.
Máselen, qurylys salasynda 102 myń mamanǵa qajettilik bolǵanymen, osy baǵytta kolledjderde 22,4 myń stýdent ǵana bilim alyp jatyr. Iaǵni eńbek naryǵynyń suranysy qazirgi daiarlaý kóleminen 4,5 ese joǵary.
Aýyl sharýashylyǵynda jaǵdai budan da kúrdeli. Salaǵa 73 myń maman qajet bolsa, kolledjderdegi bilim alýshylar sany 12,7 myń adamdy quraidy. Bul qajettilikten 5,7 ese az.
Osyǵan bailanysty memlekettik bilim berý tapsyrysyn óńirler men ekonomika salalarynyń naqty kadrlyq qajettiligine qarai qaita bólý kózdelip otyr.
Ministrdiń aitýynsha, másele tek mamandar sanyn kóbeitýmen shektelmeidi. Qazirgi jumys berýshiler kásibi bilimmen qatar kommýnikativtik qabilet, syni oilaý, ózgeristerge beiimdelý jáne tsifrlyq saýattylyq siiaqty daǵdylarǵa da mán beredi.
«Basty maqsatymyz – jumysshy kadrlardy daiarlaýdy ekonomika men óndiristiń suranysyna barynsha sáikestendirý», – dedi Súleimenova.
Onyń aitýynsha, bul mindet demografiialyq ózgerister jaǵdaiynda erekshe ózekti bolmaq. 2030 jylǵa qarai 15–18 jastaǵy jastar sany 34%-ǵa ósip, 1,1 mln-nan 1,5 mln adamǵa deiin jetedi. Al eńbek naryǵynyń jyl saiynǵy qajettiligi 225–256 myń adam deńgeiinde qalyptasady.
