Qurban aıt – Jaratýshy Iemiz belgilep bergen eki meıramnyń ulyǵy, aıtýly mereke. Halqymyz bul meıramǵa aıryqsha daıyndalyp, kópshilikpen erekshe atap ótedi. Islam dini barsha adamzatty yntymaqtastyqqa, aýyzbirlikke, ózara syılastyq pen qurmetke, izgilikke shaqyrady.
Aıt – aǵaıyn arasyn jaqyndastyra túsetin, adamzat balasyn ımandylyqqa uıytyp, qanaǵat pen táýbege shaqyratyn ulyq meıram. Bul kúnderi barsha musylman qurban shalýmen ǵana emes, Uly Allaǵa unamdy árbir izgi amaly arqyly Rabbysynyń razylyǵyna, raqymyna jaqyndaı túsedi.
Óıtkeni, arab tilindegi «qurban» sózi «jaqyn bolý», «jaqyndaý» degen uǵymdardy bildiredi. Qasıetti Quranda: «Umytpańdar, olardyń eti de, qany da eshqashan Allaǵa jetpeıdi. Oǵan jetetin nárse – júrekterińizge uıalaǵan taqýalyqtaryń (shynaıy nıetteriń)» («Haj» súresi, 37-aıat), - dep baıandalǵan.
Qarjylyq múmkindigi joq adamǵa qurban shalý – mindet emes. Qurbandyq eti aǵaıyn-týys, kórshi-qolań, turmysy tómen otbasylaryna, jetim men jesirlerge, múgedekter men naýqas jandarǵa taratylady. Elimiz bul kúnderi aýyr indetti bastan keshirýde. Osyndaı syn saǵatynda halqymyz bereke - birliktiń úlgisin kórsetip, qınalǵan jandarǵa kómek qolyn sozýda.
Qasıetti Quran Kárimniń sharh súresinde Alla Taǵala: «Ár qıyndyqpen birge sózsiz jeńildik keledi» - deıdi. Alla Taǵala duǵa-tilekterimiz ben saýapty isterimizdi jáne shalǵan qurbandyqtarymyzdy qabyl etip, jamandyqtyń aýylyn alystatyp, ár otbasyna amanshylyq, baq-bereke, mol yryzdyq násip etsin!
Táýelsiz Qazaqstan memleketiniń mereıi ústem bolyp, súıikti Otanymyzda árdaıym bereke-birlik, beıbit zaman bolsyn! Elimiz aman, jurtymyz tynysh bolsyn!
İzgi tilekpen,
Asqar qajy Ábitaıuly,
Qazaqstan musylmandary dinı basqarmasynyń
Semeı óńirindegi bas ımamy.
