Qaraǵandyda “Qazhrom” kompaniiasynyń burynǵy jumysshylary eks-basshylaryn sotqa berdi, dep habarlaidy Dalanews.kz.
KazTAG málimetinshe, shaǵymdanýshylar Qaraǵandy oblysyndaǵy marganets kenin óndirý júrgizilgen karerde BelAZ júk kólikteriniń júrgizýshisi bolyp jumys istegen. Olar karerden taý jynystaryn tasymaldaýmen ainalysqan. Aitýlarynsha, jumys berýshi ziiandy eńbek jaǵdailary úshin tiisti tólemder júrgizbegen. Sondai-aq olar jumys berýshi kásiptik mindetti zeinetaqy jarnalaryn aýdarýy tiis bolǵanyn alǵa tartady. Sebebi olardyń kásibi osy jarnalar qarastyrylǵan tizimge kiretin kórinedi. Shaǵymdanýshylar bul rette densaýlyq saqtaý jáne áleýmettik damý ministriniń “Kásipter tizimin bekitý týraly” buiryǵyna silteme jasap, karerdegi taý jynystaryn tasymaldaýmen ainalysatyn júrgizýshiniń eńbekaqyny joǵary mólsherde alýǵa quqyǵy bar ekenin málimdeidi.
Jumysshylar ózderine tiesili tólemderdi: kásiptik mindetti zeinetaqy jarnalaryn aýdarýdy jáne eńbekaqyny joǵary mólsherde tóleýin talap etedi. Olar eńbek sharttaryna sáikes, BelAZ avtosamosvalynyń júrgizýshisi qyzmeti aýyr, ziiandy jáne qaýipti eńbek jaǵdailaryna jatatynyn, bul óz kezeginde aýrýǵa shaldyǵý qaýpimen bailanysty ekenin atap ótti.
Qyrkúiekte Qazybek bi aýdandyq soty jumysshylar tobynyń “Qazhrom” transulttyq kompaniiasyna qoiǵan talaptaryn qanaǵattandyrmady. Jumysshylar sot sheshimimen kelispei, apelliatsiialyq shaǵym túsirdi. Olar sottyń sheshimin zańsyz jáne negizsiz dep sanap, talaptardy qanaǵattandyrý týraly jańa sheshim shyǵarýdy suraidy. Qazirgi ýaqytta bul azamattyq is oblystyq sottyń qaraýynda.
Birinshi satydaǵy sotta jeńilis tapqan keibir jumysshylar el prezidenti Qasym-Jomart Toqaevqa júginýdi uiǵardy.
“Konstitýtsiialyq quqyqtarymyz buzyldy. Sot istiń mán-jaiyn anyqtap, jumysymyzdyń aýyr, qaýipti jáne ziiandy eńbek jaǵdailary tizimine kiretinin jáne bizge tiesili tólemderdiń tólenbegenin rastaityn dálelderge nazar aýdarmady. Sottaǵy ziiandy eńbek jaǵdailary úshin tólem jasaldy degen sózder shyndyqqa janaspaidy. Biz karerdiń ishinde jumys istedik, marganetstiń qaýpi joǵary, al bizde osy kásipke bailanysty aýrýlar paida boldy. Sot bizdiń jumysymyz ziiandy eńbek jaǵdailary tizimine kirmeidi degen sheshimdi qandai negizde qabyldaǵany túsiniksiz. Prezidentten osy máselege nazar aýdarýdy suraimyn”, – deidi talapkerlerdiń biri Muhambetǵali Álbekov KazTAG redaktsiiasyna.
“Qazhrom” kompaniiasy burynǵy jumysshylarynyń talaptarymen kelispeidi. Olar talaptardy qanaǵattandyrmaýdy surap, jumysshylarǵa ziiandy eńbek jaǵdailary úshin tólem belgilengen tarifke sáikes jasalǵanyn alǵa tartady. Sonymen qatar kásiptik mindetti zeinetaqy jarnalaryn aýdarý qajet bolmaǵanyn, sebebi talapkerlerdiń kásibi tiisti tizimge kirmeitinin málimdeidi. Apelliatsiialyq sotta jaýapker aýdandyq sottyń sheshimin ózgerissiz qaldyryp, talapkerlerdiń shaǵymyn qanaǵattandyrmaýdy suraidy.
“Qazmarganets” ken basqarmasy – “Qazhrom” AQ filialy. Kompaniia saityndaǵy derekterge sáikes, bul kásiporyn óńirdegi iri jer qoinaýyn paidalanýshylardyń biri jáne barlanǵan totyqqan marganets kenderiniń qory boiynsha Qazaqstanda birinshi orynda tur.
