"Qazaqstan Arýy – 2026" titýlynyń iegeri Alina Ri Pýerto-Rikoda ótetin "Ǵalam Arýy – 2026" halyqaralyq baiqaýynda el namysyn qorǵaidy. Almatyda ótken baspasóz máslihatynda onyń daiyndyǵy, áleýmettik jobasy jáne quny 5 million teńgeden asatyn ulttyq obrazy tanystyryldy, dep habarlaidy dalanews.kz.
Qazaqstandyq arý baiqaýda úzdik 30 qatysýshynyń qataryna enýdi kózdep otyr. Osy maqsatta ol sahnada ózin tanystyrý, ulttyq kiim ázirleý jáne inkliýziiaǵa arnalǵan áleýmettik jobany júzege asyrý baǵyttary boiynsha daiyndalǵan.
Alina Ridiń aitýynsha, bul baiqaý ol úshin Qazaqstandy álemge tanytatyn mańyzdy múmkindik.
"Men osy baiqaýmen bir jyl boiy ómir súrip kelemin. Jaqynda “Ǵalam Arýy” sahnasynda Qazaqstannyń atynan shyǵatynyma áli de sene alar emespin. Maqsatym – elimizdi laiyqty tanystyryp, barshamyz maqtan tutatyn nátijege qol jetkizý. Qazir árbir qazaqstandyqtyń qoldaýy men úshin erekshe mańyzdy", – dedi ol.
Inkliýzivti bilimge arnalǵan joba
Baiqaýǵa daiyndyq aiasynda Alina Ri Almatydaǵy Insight mektebimen birlesip qaiyrymdylyq jobasyn qolǵa alǵan. Bastama erekshe bilim berý qajettilikteri bar balalardy qoldaýǵa jáne inkliýziia máselesine qoǵam nazaryn aýdarýǵa baǵyttalǵan.
Jobanyń negizgi maqsaty – ár balanyń ereksheligine qurmetpen qaraityn, onyń bilim alyp, damýyna jáne áleýetin ashýyna múmkindik beretin orta qalyptastyrý. Alina Ri qoǵamdaǵy tanymaldyǵyn áleýmettik máselelerdi kóterýge jáne teń múmkindikter qaǵidatyn nasihattaýǵa paidalanǵysy keletinin aitty.
Ulttyq obrazǵa 5 million teńgeden astam qarjy jumsalǵan
Baspasóz máslihatynda qazaqstandyq arýdyń halyqaralyq baiqaýda kietin ulttyq obrazy da kórsetildi. SV Muse brendimen birlesip jasalǵan kostiýmniń quny 5 million teńgeden asady, al salmaǵy shamamen 30 keli.
Obrazdyń basty ereksheligi – arnaiy mehanizmniń kómegimen sahnada ashylatyn alyp qanattar. Kiimniń kók jáne altyn tústeri Qazaqstannyń ashyq aspany men ulttyq mádenietiniń bailyǵyn beineleidi. Kostiýmniń pishini men sándik bólshekteri arqyly qazaq halqynyń dástúri men mádeni murasyn kórsetý kózdelgen.
Kórermenderdiń daýysy nátijege áser etedi
Qazir MU Fan qosymshasynda baiqaýǵa qatysýshylarǵa daýys berý júrip jatyr. Uiymdastyrýshylardyń erejesine sáikes, daýys berý qorytyndysynda alǵashqy úsh orynǵa shyqqan arýlar úzdik 30 qatysýshynyń qataryna avtomatty túrde ótedi.
Baspasóz máslihaty ótip jatqan sátte Alina Ri daýys berý qorytyndysy boiynsha 12-orynda turǵan. Onyń úzdik 30 qatysýshynyń qataryna enýi qazaqstandyqtardyń belsendiligine tikelei bailanysty bolmaq.
