Qaraǵandyda WhatsApp messendjeri arqyly 461 adamdy aldap, 700 mln teńgeden astam shyǵyn keltirgen eki áielge qatysty sot úkimi shyqty. Sot olardy alty jyl segiz aiǵa bas bostandyǵynan aiyrýǵa úkim shyǵardy, dep habarlaidy dalanews.kz.
Qazybek bi aýdandyq sotynyń baspasóz qyzmetiniń habarlaýynsha, sottalǵandarǵa taǵaiyndalǵan jazany óteý bir jylǵa keiinge shegerilgen. Jábirlenýshilerdiń azamattyq talaptary ishinara qanaǵattandyrylyp, kinálilerden 700 mln teńgeden astam qarajat óndirý týraly sheshim qabyldanǵan.
Sottalýshylar B. jáne S. birneshe ret, eki nemese odan da kóp adamǵa qatysty iri jáne asa iri mólsherde alaiaqtyq jasady dep aiyptalǵan. Olardyń áreketi QR Qylmystyq kodeksiniń 190-baby 4-bóliginiń 2-tarmaǵy boiynsha saralanǵan.
Sot anyqtaǵandai, B. WhatsApp messendjerinde Qytai men Túrkiiadan taýarlardy arzan baǵamen satýǵa arnalǵan toptar ashqan. Onda ydys-aiaq pen túrli turmystyq zattar usynylǵan. Satyp alýshylardy tartý úshin taýarlaryn alǵany týraly pikirler de jariialanǵan.
Keiin B. men S. jihaz, turmystyq tehnika jáne avtokólikterdi naryqtaǵy baǵadan edáýir arzan satatynyn jarnamalaǵan. Bul úshin ózge adamdardyń pikirleri túsirilgen beinerolikterdi paidalanǵan.
Alaiaqtar tapsyrystar qabyldap, satyp alýshylardan aqsha alǵan. Olar taýarlardy jetkizýge ýáde bergenimen, bastapqyda-aq mindettemelerin oryndaýdy kózdemegen.
Nátijesinde 461 adam zardap shegip, keltirilgen jalpy shyǵyn 700 mln teńgeden asqan.
Sot úkimi ázirge zańdy kúshine engen joq.
