Qazaqstanda merzimdi áskeri qyzmettiń jańa júiesi engizilmek. Endi sarbazdar alǵashqy alty aida arnaiy oqý ortalyqtarynda daiyndyqtan ótip, qalǵan alty aiyn áskeri bólimderde ótkizedi. Bul ózgeris Prezident Qasym-Jomart Toqaevtyń tóraǵalyǵymen ótken Qaýipsizdik Keńesiniń otyrysynda maquldanǵan áskeri reforma josparynda qarastyrylǵan, dep habarlaidy dalanews.kz.
Memleket basshysy elimizdiń qorǵanys qabiletin kúsheitip, armiiany qazirgi zaman talaptaryna beiimdeý qajettigin atap ótti. Osy maqsatta Qarýly Kúshterdiń qurylymy, áskeri basqarý júiesi, kadr daiarlaý jáne tehnologiialyq jaraqtandyrý baǵyttary qaita qaralmaq.
Jańa jospardy Qaýipsizdik Keńesi Tóraǵasynyń orynbasary Aida Balaeva tanystyrdy.
Sarbazdar alty ai oqyp, alty ai áskeri bólimde qyzmet etedi
Áskeri reformanyń basty jańalyqtarynyń biri – merzimdi áskeri qyzmetti eki kezeńge bólý.
Josparǵa sáikes, áskerge shaqyrylǵan azamattar alǵashqy alty aida oqý ortalyqtarynda áskeri daiarlyqtan ótedi. Bul kezeńde olar áskeri qyzmetke qajetti teoriialyq bilim men tájiribelik daǵdylardy meńgeredi.
Al keiingi alty aida sarbazdar áskeri bólimderge jiberilip, jaýyngerlik daiyndyqqa qatysady jáne bólimshe quramynda ózderine júktelgen mindetterdi oryndaidy.
Jańa tásil sarbazdardyń kásibi daiyndyǵyn arttyrýǵa jáne áskeri qyzmetti uiymdastyrýdy jetildirýge baǵyttalǵan.
Degenmen bul – maquldanǵan reforma josparyndaǵy ózgeris. Jańa tártiptiń naqty qoldanysqa engiziletin merzimi bólek aiqyndalýy tiis.
Áskerdegi sarbazdardyń quqyǵyn qorǵaityn jańa qyzmetter paida bolady
Reforma aiasynda áskeri qyzmetshilerdiń qaýipsizdigine erekshe kóńil bólinbek.
Atap aitqanda, Áskeri konsýltanttar institýtyn jáne Áskeri qyzmetshiler isteri jónindegi ýákil qyzmetin qurý josparlanǵan.
Bul qurylymdar áskeri qyzmetshilerdiń quqyqtaryn qorǵaý jáne olardyń máselelerin sheshý tetikterin jetildirýge baǵyttalmaq.
Sonymen qatar armiiadaǵy jarǵyǵa qaishy áreketterdiń aldyn alý, áskeri tártipti kúsheitý jáne basshylyq mádenietin jaqsartý sharalary qarastyrylǵan.
Qazaqstanda Ushqyshsyz júieler kúshteri qurylady
Qarýly Kúshterdi jańǵyrtý aiasynda áskeri tehnologiialardy damytýǵa da basymdyq beriledi.
Jospar boiynsha Qazaqstanda jeke Ushqyshsyz júieler kúshterin qurý kózdelgen.
Budan bólek, Qarýly Kúshterdiń qurylymy men quramyn qaita qaraý, qorǵanysty josparlaý júiesin jetildirý jáne áskerdiń negizgi komponentterin kúsheitý josparlanyp otyr.
Prezident zamanaýi, utqyr ári tehnologiialyq turǵydan damyǵan armiia qalyptastyrý mańyzdy ekenin atap ótken.
Áskeri mektepter sany artýy múmkin
Josparda jastardyń áskeri-patriottyq tárbiesine qatysty jańalyqtar da bar.
«Adal azamat» tujyrymdamasyna negizdelgen «Jas aibyn» biryńǵai áskeri-patriottyq daiarlyq júiesin damytý kózdelgen.
Sonymen qatar mamandandyrylǵan áskeri mektepter jelisin keńeitý jáne bastapqy áskeri daiarlyqtyń sapasyn arttyrý usynylǵan.
Qorǵanys ministri Aidos Myrzahmetov Qarýly Kúshterdi jańǵyrtý baǵytyndaǵy jumystar týraly baiandady.
Onyń ishinde armiianyń jańa aqparattyq-kommýnikatsiialyq strategiiasyn qabyldaý jáne «Zań men tártip» qaǵidatyna sáikes tárbie jumystaryn jetildirý máseleleri qarastyrylǵan.
Áskeri reforma qashan júzege asyrylady?
Josparǵa sáikes, alǵashqy uiymdastyrý sharalary 2026 jyldyń sońyna deiin oryndalýy tiis.
Al negizgi tujyrymdamalyq ózgeristerdi 2027 jyly júzege asyrý kózdelgen.
Qaýipsizdik Keńesiniń otyrysynda Prezident Qorǵanys ministrliginiń qyzmetin keshendi tekserip jatqan komissiianyń jumysyn jyl sońyna deiin aiaqtaýdy tapsyrdy.
Memleket basshysy áskeri qaýipsizdikti qamtamasyz etý tek Qorǵanys ministrliginiń mindeti emes, búkil memlekettik júieniń ortaq jaýapkershiligi ekenin atap ótti.
Otyrys qorytyndysynda Áskeri reforma jospary maquldanyp, onyń oryndalýyn úilestirý Úkimet pen Qaýipsizdik Keńesine júkteldi.
