قازاقستاندا مەرزٸمدٸ ەسكەري قىزمەتتٸڭ جاڭا جٷيەسٸ ەنگٸزٸلمەك. ەندٸ ساربازدار العاشقى التى ايدا ارنايى وقۋ ورتالىقتارىندا دايىندىقتان ٶتٸپ, قالعان التى ايىن ەسكەري بٶلٸمدەردە ٶتكٸزەدٸ. بۇل ٶزگەرٸس پرەزيدەنت قاسىم-جومارت توقاەۆتىڭ تٶراعالىعىمەن ٶتكەن قاۋٸپسٸزدٸك كەڭەسٸنٸڭ وتىرىسىندا ماقۇلدانعان ەسكەري رەفورما جوسپارىندا قاراستىرىلعان, دەپ حابارلايدى dalanews.kz.
مەملەكەت باسشىسى ەلٸمٸزدٸڭ قورعانىس قابٸلەتٸن كٷشەيتٸپ, ارمييانى قازٸرگٸ زامان تالاپتارىنا بەيٸمدەۋ قاجەتتٸگٸن اتاپ ٶتتٸ. وسى ماقساتتا قارۋلى كٷشتەردٸڭ قۇرىلىمى, ەسكەري باسقارۋ جٷيەسٸ, كادر دايارلاۋ جەنە تەحنولوگييالىق جاراقتاندىرۋ باعىتتارى قايتا قارالماق.
جاڭا جوسپاردى قاۋٸپسٸزدٸك كەڭەسٸ تٶراعاسىنىڭ ورىنباسارى ايدا بالاەۆا تانىستىردى.
ساربازدار التى اي وقىپ, التى اي ەسكەري بٶلٸمدە قىزمەت ەتەدٸ
ەسكەري رەفورمانىڭ باستى جاڭالىقتارىنىڭ بٸرٸ – مەرزٸمدٸ ەسكەري قىزمەتتٸ ەكٸ كەزەڭگە بٶلۋ.
جوسپارعا سەيكەس, ەسكەرگە شاقىرىلعان ازاماتتار العاشقى التى ايدا وقۋ ورتالىقتارىندا ەسكەري دايارلىقتان ٶتەدٸ. بۇل كەزەڭدە ولار ەسكەري قىزمەتكە قاجەتتٸ تەورييالىق بٸلٸم مەن تەجٸريبەلٸك داعدىلاردى مەڭگەرەدٸ.
ال كەيٸنگٸ التى ايدا ساربازدار ەسكەري بٶلٸمدەرگە جٸبەرٸلٸپ, جاۋىنگەرلٸك دايىندىققا قاتىسادى جەنە بٶلٸمشە قۇرامىندا ٶزدەرٸنە جٷكتەلگەن مٸندەتتەردٸ ورىندايدى.
جاڭا تەسٸل ساربازداردىڭ كەسٸبي دايىندىعىن ارتتىرۋعا جەنە ەسكەري قىزمەتتٸ ۇيىمداستىرۋدى جەتٸلدٸرۋگە باعىتتالعان.
دەگەنمەن بۇل – ماقۇلدانعان رەفورما جوسپارىنداعى ٶزگەرٸس. جاڭا تەرتٸپتٸڭ ناقتى قولدانىسقا ەنگٸزٸلەتٸن مەرزٸمٸ بٶلەك ايقىندالۋى تيٸس.
ەسكەردەگٸ ساربازداردىڭ قۇقىعىن قورعايتىن جاڭا قىزمەتتەر پايدا بولادى
رەفورما اياسىندا ەسكەري قىزمەتشٸلەردٸڭ قاۋٸپسٸزدٸگٸنە ەرەكشە كٶڭٸل بٶلٸنبەك.
اتاپ ايتقاندا, ەسكەري كونسۋلتانتتار ينستيتۋتىن جەنە ەسكەري قىزمەتشٸلەر ٸستەرٸ جٶنٸندەگٸ ۋەكٸل قىزمەتٸن قۇرۋ جوسپارلانعان.
بۇل قۇرىلىمدار ەسكەري قىزمەتشٸلەردٸڭ قۇقىقتارىن قورعاۋ جەنە ولاردىڭ مەسەلەلەرٸن شەشۋ تەتٸكتەرٸن جەتٸلدٸرۋگە باعىتتالماق.
سونىمەن قاتار ارميياداعى جارعىعا قايشى ەرەكەتتەردٸڭ الدىن الۋ, ەسكەري تەرتٸپتٸ كٷشەيتۋ جەنە باسشىلىق مەدەنيەتٸن جاقسارتۋ شارالارى قاراستىرىلعان.
قازاقستاندا ۇشقىشسىز جٷيەلەر كٷشتەرٸ قۇرىلادى
قارۋلى كٷشتەردٸ جاڭعىرتۋ اياسىندا ەسكەري تەحنولوگييالاردى دامىتۋعا دا باسىمدىق بەرٸلەدٸ.
جوسپار بويىنشا قازاقستاندا جەكە ۇشقىشسىز جٷيەلەر كٷشتەرٸن قۇرۋ كٶزدەلگەن.
بۇدان بٶلەك, قارۋلى كٷشتەردٸڭ قۇرىلىمى مەن قۇرامىن قايتا قاراۋ, قورعانىستى جوسپارلاۋ جٷيەسٸن جەتٸلدٸرۋ جەنە ەسكەردٸڭ نەگٸزگٸ كومپونەنتتەرٸن كٷشەيتۋ جوسپارلانىپ وتىر.
پرەزيدەنت زاماناۋي, ۇتقىر ەرٸ تەحنولوگييالىق تۇرعىدان دامىعان ارمييا قالىپتاستىرۋ ماڭىزدى ەكەنٸن اتاپ ٶتكەن.
ەسكەري مەكتەپتەر سانى ارتۋى مٷمكٸن
جوسپاردا جاستاردىڭ ەسكەري-پاتريوتتىق تەربيەسٸنە قاتىستى جاڭالىقتار دا بار.
«ادال ازامات» تۇجىرىمداماسىنا نەگٸزدەلگەن «جاس ايبىن» بٸرىڭعاي ەسكەري-پاتريوتتىق دايارلىق جٷيەسٸن دامىتۋ كٶزدەلگەن.
سونىمەن قاتار مامانداندىرىلعان ەسكەري مەكتەپتەر جەلٸسٸن كەڭەيتۋ جەنە باستاپقى ەسكەري دايارلىقتىڭ ساپاسىن ارتتىرۋ ۇسىنىلعان.
قورعانىس مينيسترٸ ايدوس مىرزاحمەتوۆ قارۋلى كٷشتەردٸ جاڭعىرتۋ باعىتىنداعى جۇمىستار تۋرالى باياندادى.
ونىڭ ٸشٸندە ارمييانىڭ جاڭا اقپاراتتىق-كوممۋنيكاتسييالىق ستراتەگيياسىن قابىلداۋ جەنە «زاڭ مەن تەرتٸپ» قاعيداتىنا سەيكەس تەربيە جۇمىستارىن جەتٸلدٸرۋ مەسەلەلەرٸ قاراستىرىلعان.
ەسكەري رەفورما قاشان جٷزەگە اسىرىلادى?
جوسپارعا سەيكەس, العاشقى ۇيىمداستىرۋ شارالارى 2026 جىلدىڭ سوڭىنا دەيٸن ورىندالۋى تيٸس.
ال نەگٸزگٸ تۇجىرىمدامالىق ٶزگەرٸستەردٸ 2027 جىلى جٷزەگە اسىرۋ كٶزدەلگەن.
قاۋٸپسٸزدٸك كەڭەسٸنٸڭ وتىرىسىندا پرەزيدەنت قورعانىس مينيسترلٸگٸنٸڭ قىزمەتٸن كەشەندٸ تەكسەرٸپ جاتقان كوميسسييانىڭ جۇمىسىن جىل سوڭىنا دەيٸن اياقتاۋدى تاپسىردى.
مەملەكەت باسشىسى ەسكەري قاۋٸپسٸزدٸكتٸ قامتاماسىز ەتۋ تەك قورعانىس مينيسترلٸگٸنٸڭ مٸندەتٸ ەمەس, بٷكٸل مەملەكەتتٸك جٷيەنٸڭ ورتاق جاۋاپكەرشٸلٸگٸ ەكەنٸن اتاپ ٶتتٸ.
وتىرىس قورىتىندىسىندا ەسكەري رەفورما جوسپارى ماقۇلدانىپ, ونىڭ ورىندالۋىن ٷيلەستٸرۋ ٷكٸمەت پەن قاۋٸپسٸزدٸك كەڭەسٸنە جٷكتەلدٸ.
